Wararka24: Madaxweyne Xasan Sheekh Maxamuud, ayaa si kulul u dhaliilay kooxaha uu ku tilmaamay kuwa ka soo horjeeda horumarka dalka, isagoo si gaar ah farta ugu fiiqay Al-Shabaab, sheegayna in ay hadalka uqaadaan shaqsiyaad Soomaali ah, iyo qaar ka mid ah ajaanibta . Hadalkan ayuu jeediyay shali jimcihii khudbadii Masjidka Shuhadada ee Madaxtooyada Soomaaliya.
Madaxweyne Xasan Sheekh ayaa sheegay in ay jiraan dad Soomaaliyeed oo aan dan ka lahayn horumarka dalka, balse ka faa’iidaysta dhibaatooyinka jira. kana macaasha dhibaatooyinka ka jira dalka Sidoo kale, wuxuu xusay in qaar ka mid ah ajaanibta ay ka walaacsan yihiin haddii Soomaaliya ay xasisho oo ay ka maaranto kaalmadooda. Wuxuu dhaliilay kuwa dhibaatada xal u arka halkii ay wax ka qaban lahaayeen.
“Propagandada maalmahan socota waxaa iska leh Shabaab. Iyagaa abuuray, nasiib darro waxaa jira Soomaali iyo ajaanib xambaarsan fariimahooda oo u gudbiya meel walba,” ayuu yiri madaxweynaha.
Madaxweyne Xasan Sheekh ayaa sido kale ka hadlay Xiisadda Amniga ee Dalka
Hadalka Madaxweynaha ayaa yimid maalmo kadib markii safaaradda Mareykanka ee Muqdisho ay soo saartay digniin la xiriirta suurtagalnimada weeraro ka dhici kara goobaha muhiimka ah, gaar ahaan garoonka diyaaradaha Aadan Cadde. Warbixintan ayaa la rumeysan yahay inay keentay in shirkadaha diyaaradaha ee EgyptAir iyo Turkish Airlines ay hakiyaan duulimaadyadoodii Muqdisho, taasoo walaac hor leh ka abuurtay dhinaca amniga.
Madaxweyne Xasan Sheekh ayaa xusay in ka dib markii dagaalka tooska ah ee Al-Shabaab lagu wiiqi waayay, la bilaabay olole cabsi gelin ah oo bulshada lagu qalqal gelinayo. Isagoo tusaale u soo qaatay afur wadareed ka dhacay Isbitaalka Hodan ee Muqdisho, wuxuu sheegay in tani ay muujinayso horumarka amniga ee caasimadda.
Dooddan ayaa kusoo beegmaysa iyadoo dowladda Soomaaliya ay dagaallo adag kula jirto Al-Shabaab, gaar ahaan howlgallada ka socda gobollada Shabeellaha Dhexe iyo Hiiraan.