Wararka24: 26-02-2026 Dowladda Masar ayaa si adag u beenisay warar sheegayay in Qaahira ay u bandhigtay Itoobiya kaalmeyn la xiriirta helitaanka marin badeed oo ku aaddan Badda Cas, si taa beddelkeeda ay Itoobiya u muujiso dabacsanaan ku saabsan muranka biyo-xireenka Webiga Niil (GERD).
Mas’uul u hadlay dowladda Masar ayaa sheegay in wararkaasi yihiin kuwo aan sal iyo raad toona lahayn, sida lagu xusay war ay baahisay wakaaladda rasmiga ah ee MENA.
Mas’uulka ayaa adkeeyay in mowqifka rasmiga ah ee Masar ee ku aaddan khilaafka GERD uusan wax isbeddel ah ku imaan, isla markaana Qaahira aysan bixin wax dalab ah oo la xiriira marin badeed si loogu beddesho tanaasul biyo-dhaqaale ama amni. Dowladda Masar ayaa mar kale ku celisay in ay doonayso heshiis waara oo damaanad qaadaya xuquuqda biyaha dalalka hoose ee Webiga Niil.
Wararka la beeniyay ayaa ka dhashay warbixin toddobaadkan uu daabacay wargeyska The National ee Imaaraadka Carabta, oo ku dooday in Masar ay soo gaarsiisay Ra’iisul Wasaaraha Itoobiya, Abiy Axmed, soo-jeedin la xiriirta ka shaqeynta marin ganacsi oo badeed.
Warbixintu waxay intaas ku dartay in arrintaasi lala wadaagay Mareykanka, xilli Washington ay muujisay rabitaan dhexdhexaadin ku saabsan khilaafka GERD.
Masar iyo Itoobiya ayaa muddo ka badan toban sano ku jiray muran ku saabsan biyo-xireenka weyn ee GERD, oo laga dhisay isha ugu weyn ee Webiga Niil, kaas oo Masar u aragto khatar ku wajahan amnigeeda biyo-dhaqaale. Itoobiya ayaa dhankeeda ku adkeysatay in mashruucu yahay mid horumarineed oo ay xaq u leedahay, iyadoo aan weli la gaarin heshiis kama dambeys ah oo dhinacyadu ku wada qanacsan yihiin.
Helitaanka marin badeed ayaa weli ah arrin istaraatiiji ah oo Itoobiya mudnaan siinayso tan iyo markii ay noqotay dal aan bad lahayn kadib madax-bannaanidii Eritrea. Labada dowladood midna si rasmi ah ugama hadlin warbixinta The National marka laga reebo beeninta kasoo baxday dowladda Masar.
