Senator Flavio Bolsonaro, oo ah wiilka madaxweynihii hore ee Brazil Jair Bolsonaro, ayaa la sheegay inuu dalka uga baxay dhanka Mareykanka, dhowr maalmood kaddib markii uu doorashada madaxtooyada kaga guuldarraystay Madaxweyne Luiz Inacio Lula da Silva. Washington ayaa sheegtay inay isaga iyo qoyskiisa siinayso fiisooyin.
Sarkaal sare oo ka tirsan Wasaaradda Arrimaha Dibadda Mareykanka, oo codsaday in aan magaciisa la shaacin, ayaa Talaadadii sheegay in wasaaraddu ay fiisooyin siin doonto Flavio Bolsonaro iyo qoyskiisa, loona oggolaan doono inay galaan Mareykanka, sida ay werisay wakaaladda AP. Sarkaalka ma uusan caddeyn in Flavio uu horeba dalka uga baxay iyo in uu weli ku jiro safar.
Baxitaankiisa ayaa yimid kaddib markii Garsoore Alexandre de Moraes oo ka tirsan Maxkamadda Sare ee Brazil uu amar ku bixiyay in Flavio uu booliska federaalka u dhiibo baasaboorkiisa caadiga ah iyo kan diblomaasiyadeed. Amarkaas oo la soo saaray Axaddii ayaa loo gudbiyay Isniintii, waxaana muddadiisu ku ekeyd duhurkii Talaadada. Ilaa hadda lama oga in uu baasaboorrada soo dhiibay.
Warbaahinta Argentina qaar ayaa sheegay in Flavio uu Argentina sii maray isagoo u socda Mareykanka, balse dowladda Argentina ayaa beenisay inuu dalkeeda soo galay.
Flavio ayaa wajahaya laba baaritaan oo ay wado Maxkamadda Sare, kuwaas oo la xiriira eedeymo musuqmaasuq, lacag dhaqid iyo canshuur bixin la’aan, sida ay werisay AP. Isaga ayaa beeniyay wax qalad ah inuu sameeyay, wuxuuna sheegay in Garsoore de Moraes, oo hoggaamiya mid ka mid ah baaritaannada, uu xulafo la yahay Lula.
“Weligay kama fikirin inaan dalka ka baxo,” ayuu Flavio ku yiri muuqaal uu soo dhigay ka hor inta aan la sheegin inuu dalka ka tegay. Wuxuu raaciyay inuu baasaboorrada dhiibi doono, amarkaasna uu ku tilmaamay isku day cabsi gelin ah.
Lula oo ku eedeeyay qoyska Bolsonaro
Madaxweyne Lula, oo sheegay inuusan haysan macluumaad sax ah oo ku saabsan meesha uu Flavio joogo balse rumeysan yahay inuu dalka ka baxay, ayaa si adag u dhaleeceeyay qoyska Bolsonaro. Wuxuu taageerayaashiisa u sheegay in Brazil ay u tahay qoyskaas “dalka labaad,” isagoo intaa ku daray in qof aan dambi lahayn uusan baqin, qofka si qarsoodi ah dalka uga baxana uu u badan yahay inuu wax ku eedeysan yahay.
Lula ayaa doorashadii wareegga labaad ee 25-kii Oktoobar ku guuleystay isagoo ka helay in ka badan 64 milyan oo cod, halka Flavio uu helay wax ka yar 60 milyan, farqiguna uu gaaray 4.4 milyan oo cod.
Flavio ayaa diiday inuu aqbalo natiijada, wuxuuna ku andacooday in doorashada la musuqay, balse ma uusan soo bandhigin wax caddeyn ah. Xisbigiisa Liberal Party ayaa Isniintii sheegay inuu aqbalay natiijada, inkastoo Flavio laftiisu uusan weli qirin guuldarrada, sida ay werisay Al Jazeera.
Madaxweynaha Mareykanka Donald Trump ayaa isna Isniintii sheegay in doorashadu u muuqatay mid la musuqay, isagoon caddeyn soo bandhigin.
Qoyska Bolsonaro oo horey uga baxay Brazil
Tani ma aha markii ugu horreysay ee qoyska Bolsonaro uu u ambabaxo Mareykanka kaddib guuldarro doorasho. Jair Bolsonaro ayaa doorashadii 2022 kaddib u dhoofay Florida, wuxuuna dalka ku soo laabtay saddex bilood kaddib. Hadda wuxuu ku jiraa xabsi guri, isagoo u xukuman 27 sano oo xarig ah kaddib markii lagu helay inuu isku dayay afgambi.
Walaalkiis Eduardo Bolsonaro, oo ku nool gobolka Texas, ayaa horey ugu baaqay in Flavio uu dalka ka baxo haddii uu guuldarraysto. Eduardo ayaa bishii Juun maqnaanshihiisa lagu xukumay afar sano oo xabsi ah.
Muddada xilka senatoornimo ee Flavio ayaa dhammaaneysa 31-ka Janaayo 2027, taasoo soo afjaraysa xasaanadda gaarka ah ee uu ka haysto Maxkamadda Sare. Natiijada doorashada ayaa si rasmi ah loo ansixin doonaa 18-ka Diseembar.
