Wararka24: Ugu yaraan lix askari oo ka tirsan Ciidanka Xoogga Dalka Soomaaliyeed ayaa ku dhintay, saddex kalena way ku dhaawacmeen kadib laba qarax oo siyaabo kala duwan loogu beegsaday duleedka magaalada Baydhabo ee xarunta gobolka Baay.
Qaraxa koowaad ayaa gelinkii dambe ee Axaddii lala beegsaday ciidamo lugaynayay oo ka baxay Baydhabo, kuna sii jeeday deegaanka Deynuunaay oo qiyaastii 26 kiiloomitir dhanka bari kaga beegan magaalada. Qaraxaas ayaa waxaa ku dhintay saddex askari, waxaana dadka dhintay ku jiray sarkaalka hoggaaminayay ciidamada oo lagu magacaabi jiray Dhamme Cabdiraxmaan Cismaan Maxamed, loona yaqaanay Saylici.
Qaraxa labaad ayaa dhacay fiidnimadii xalay, waxaana lala beegsaday ciidamo saarnaa gaari nooca Cabdi Bile ah oo marayay waddada isku xirta Baydhabo iyo Deynuunaay. Goobta uu qaraxu ka dhacay ayaa u dhexeysa magaalada Baydhabo iyo deegaanka Burjeed, oo qiyaastii 11 kiiloomitir dhanka bari kaga beegan magaalada.
Wararka ayaa sheegaya in gaariga ay ciidamada la socdeen uu haleelay qarax lagu aasay waddada dhinaceeda, kaas oo sababay dhimashada saddex askari iyo dhaawaca saddex kale. Labadan weerar ayaa dhacay xilli ay ciidamada ammaanka ka wadaan dhaq-dhaqaaqyo milatari qaybo ka mid ah gobolka Baay.
Sarkaal ka tirsan Saraakiisha Qaybta 60-aad ee Ciidanka Xoogga Dalka ee ku sugan Baydhabo ayaa xaqiijiyay in labada qarax ay ku dhinteen lix askari, halka saddex kale ay ku dhaawacmeen. Faahfaahin dheeraad ah oo ku saabsan xaaladda dhaawacyada iyo cidda fulisay weerarrada ayaan weli la shaacin.
Ilaa hadda ma jirto cid si rasmi ah u sheegatay mas’uuliyadda labada qarax. Si kastaba ha ahaatee, weerarrada ayaa lala xiriirinayaa maleeshiyada Al-Shabaab, inkastoo aan weli la soo bandhigin caddeyn rasmi ah oo xaqiijinaysa cidda ka dambeysay.
Qaraxyadan ayaa muujinaya khatarta amni ee ka jirta waddooyinka isku xira Baydhabo iyo deegaannada ku dhow, xilli gobolka Baay ay ka socdaan dhaqdhaqaaqyo ciidan iyo xiisado amni. Lama oga in weerarradu saameyn ku yeelan doonaan howlgalada ciidamada ee ka socda aaggaas.
