Madaxweynaha Jamhuuriyadda Soomaaliya, Xasan Sheekh Maxamuud, iyo Ra’iisul Wasaaraha Xukuumadda Federaalka, Xamse Cabdi Barre, ayaa caawa magaalada Muqdisho kula kulmay xubno ka tirsan culimada Soomaaliyeed.
Kulankan oo ka dhacay Madaxtooyada Qaranka ayaa lagu qabtay afur rasmi ah oo lagu martiqaaday culimada, si ay ugala hadlaan doorka muhiimka ah ee ay ka ciyaarayaan xasillinta iyo horumarinta dalka.
War rasmi ah oo ka soo baxay Villa Somalia ayaa lagu sheegay in Madaxweyne Xasan Sheekh uu culimada la wadaagay muhiimadda ay leedahay iskaashiga iyo isku xirnaanta culimada, shacabka, iyo dowladda, taasoo laf-dhabar u ah qaranimada Soomaaliya.
“Madaxweynaha ayaa culimada ku bogaadiyay kaalintooda muhiimka ah ee wacyigelinta bulshada, dib-u-heshiisiinta, iyo xasillinta dalka. Wuxuu si gaar ah u xusay doorkooda ku aaddan baraarujinta bulshada ee la dagaalanka Khawaarijta iyo afkaarta xagjirnimada,” ayaa lagu yiri qoraalka ka soo baxay Madaxtooyada.
Madaxweyne Xasan Sheekh ayaa culimada ku dhiirrigeliyay in ay sii xoojiyaan doorkooda hoggaamineed, iyagoo garab istaagaya dadaallada dowladdu ay ku bixinayso nabadda iyo xoreynta dalka.
Dhanka kale, Madaxweynuhu waxa uu culimada ka dhageystay talooyin wax ku ool ah oo la xiriira xoojinta dowladnimada, la dagaalanka been abuurka argagixisada ee la xiriira diinta, iyo horumarinta danta guud ee ummadda Soomaaliyeed.
Kulanka waxaa sidoo kale ka qeyb galay Wasiirka Diinta & Awqaafta, Mukhtaar Roobow Cali, oo ka mid ah mas’uuliyiintii goobta joogay.
