Wararka24: Dowladda Imaaraadka Carabta ayaa si kulul u cambaareysay tallaabooyin ay ku eedeysay dowladda Soomaaliya, kuwaas oo ay sheegtay inay sii hurinayaan xiisadda isla markaana dhaawacayaan xiriirka diblomaasiyadeed iyo iskaashiga labada dal.
War-saxaafadeed ay soo saartay Wasaaradda Arrimaha Dibadda Imaaraadka ayaa lagu sheegay in go’aannada saameynaya xiriirka dowladaha ay tahay inay ku dhisnaadaan danaha wadajirka ah, kana fogaadaan khilaafaadka siyaasadeed iyo arrimaha gudaha ee dalalka.
Wasaaradda ayaa sheegtay inay ka xun tahay waxa ay ku tilmaantay isku dayga dowladda Soomaaliya ay khilaafaadka siyaasadeed ee gudaha dalka ay ku lifaaqeyso xiriirka labada dowladood. Waxay ka digtay in tallaabooyinka noocaas ahi ay saameyn ku yeelan karaan danaha labada shacab.
Imaaraadka ayaa sidoo kale sheegay inuu bishii Janaayo ee sanadkan xiray safaaraddiisa Muqdisho, isla markaana uu Soomaaliya kala baxay diblomaasiyiintiisa. Tallaabadaas ayuu ku sababeeyay waxa uu ku tilmaamay dhaqammo cadaawadeed oo dowladda Soomaaliya kula kacday safaaradda iyo siyaasadaha Imaaraadka.
War-saxaafadeedka ayaa sidoo kale lagu xusay go’aankii dowladda Soomaaliya ay ku baabi’isay heshiisyadii laba geesoodka ahaa ee kala dhexeeyay Imaaraadka, kaas oo qayb ka ahaa khilaafka labada dal.
Dhanka kale, Wasaaradda Arrimaha Dibadda Imaaraadka ayaa sheegtay inay weli qadarin weyn u hayso shacabka Soomaaliyeed, isla markaana ay qiimeyso xiriirka taariikhiga ah iyo xusuusta wadajirka ah ee labada bulsho.
Waxay intaas ku dartay in Imaaraadku ay ka go’an tahay ilaalinta iyo xoojinta xiriirkaas, gaar ahaan xiriirka uu la leeyahay Soomaalida ku nool gudaha Imaaraadka iyo dadka Soomaaliyeed ee booqda dalkaas.
Xiriirka Soomaaliya iyo Imaaraadka ayaa muddooyinkii u dambeeyay wajahaya khilaaf diblomaasiyadeed oo xooggan. Xiisadda ayaa la xiriirta arrimo ay ka mid yihiin heshiisyadii labada dhinac, doorka Imaaraadka ee Soomaaliya iyo eedeymo ku saabsan faragelin siyaasadeed.
Khilaafkan ayaa sidoo kale dib noo xusuusinaya tallaabo la mid ah tii ay qaaday dowladdii madaxweyne Maxamed Cabdullaahi Farmaajo, xilligaas oo Soomaaliya ay Imaaraadka ku eedeysay faragelin ay ku hayaan arrimaheeda gudaha.









