Dowladda Maraykanka ayaa markii ugu horreysay shaacisay muuqaal muujinaya duqeyn xooggan oo lala beegsaday xubno ka tirsan ururka Daacish ee ku dhuumaaleysanaya buuraha gobolka Bari ee Puntland.
Muuqaalkan ayaa lagu arkayay diyaarado dagaal oo si toos ah u garaacaya goob ay ku sugnaayeen xubno lagu tuhunsan yahay inay ka tirsan yihiin kooxda Daacish. Weerarka ayaa ka dhacay buuraleyda Cal Miskaad, waxaana la rumeysan yahay in la dilay xubno muhiim ah oo katirsan kooxdaasi.
Taliska ciidamada Maraykanka ee Afrika (AFRICOM) ayaa sheegay in weerarkan uu qeyb ka yahay howlgallo qorsheysan oo la fulinayo si looga hortago fiditaanka kooxaha xagjirka ah ee khatar ku ah gobolka.
Waxa kale oo ay sheegeen in weerarka uu si gaar ah u beegsaday shaqsiyaad muhiim ah oo horkacayay dhaqdhaqaaqyada kooxda Daacish gudaha Soomaaliya.
Ciidamada Puntland ayaa horay u shaaciyey inay sii wadi doonaan la dagaallanka kooxaha khatarta ku haya amniga, iyadoo si gaar ah loo bartilmaameedsanayo meelaha ay kooxda Daacish ka abaabulaan weerarada.
Warbixinnada gudaha Puntland laga helayo ayaa tilmaamaya in duqeyntan ay qeyb ka tahay dadaal wadajir ah oo lagu xoojinayo amniga gobolka, lagana hortagayo weerarro dhici lahaa. Dowladda Puntland ayaa sidoo kale sheegay in xiriir joogto ah kala dhaxeeyo saaxiibada caalamka si looga mira dhaliyo dagaalka ka dhanka ah argagixisada.
Allaabadan cusub ee Maraykanku ku soo bandhigay muuqaalka weerarka waxay sare u qaadday kalsoonida shacabka ee ku aaddan in beesha caalamku si dhab ah uga go’antahay inay ka qeyb qaadato xasilinta Soomaaliya.
