Xildhibaan Gavin Williamson oo ka tirsan Baarlamaanka Boqortooyada Ingiriiska ayaa si cad ugu baaqay beesha caalamka inay si rasmi ah u aqoonsato Somaliland, isagoo sheegay in maamulkaasi uu buuxiyay shuruudihii dawladnimada madaxbannaan.
Williamson ayaa hadalkan jeediyay xilli uu ka qeybgalayay xuska 18-ka May ee lagu qabtay magaalada London, munaasabaddaas oo lagu xusayey sannad-guuradii 34-aad ee kasoo wareegtay markii Somaliland ay sheegtay inay ka go’day Soomaaliya inteeda kale.
Xildhibaanka oo horey u soo noqday wasiir difaac ayaa Somaliland ku sifeeyay meel xasilloon oo dimuqraadiyadeed, isagoo sheegay in muddada ay goonida isu taagtay ay horumar ballaaran ka samaysay dhinacyada amniga, doorashooyinka xor ah, iyo maamulka dowladnimo.
Somaliland waxay noqotay tusaale wanaagsan oo laga baran karo xasilooni iyo hoggaan wanaagsan, halka Soomaaliya ay wali la tacaalayso rabshado, musuqmaasuq iyo argagixiso,” ayuu yiri Gavin Williamson oo si adag uga hadlay farqiga u dhexeeya labada maamul.
Sidoo kale wuxuu dalalka muhiimka ah sida Ingiriiska, Maraykanka, Imaaraadka Carabta iyo Itoobiya ugu baaqay inay aqoonsi buuxa siiyaan Somaliland, isagoo tilmaamay in beesha caalamka aysan dib u dhigi karin xuquuqda shacabka Somaliland ee ah inay noqdaan dal madax bannaan.
Xildhibaan Gavin Williamson ayaa si gaar ah u xusay in Somaliland ay qabatay doorashooyin xor ah oo lagu kala guuleystay si nabad ah, taasoo uu ku tilmaamay guul dhif iyo naadir ah oo ka dhacday Geeska Afrika.
