Ra’iisul Wasaarihii hore ee Soomaaliya, Xasan Cali Khayre, ayaa si kulul u cambaareeyay hoggaanka Madaxweyne Xasan Sheekh Maxamuud, isagoo ku eedeeyay in uu wado siyaasad wiiqeysa midnimada iyo wadajirka ummadda Soomaaliyeed.
Khayre ayaa ku dhaliilay Madaxweynaha inuu ka leexday hannaankii dimuqraadiyadda, isla markaana uu bilaabay qorshe siyaasadeed u muuqda mid dano gaar ah lagu raadinayo. Waxa uu sheegay in ficilada noocaas ah ay carqaladeynayaan dadaallada lagu dhisayo dowladnimo xasilloon oo loo dhanyahay.
Sida uu sheegay Khayre, dhismaha xisbi siyaasadeed oo uu Madaxweyne Xasan Sheekh hormuud ka yahay xilli uu xilka hayo, wuxuu khatar ku yahay kalsoonida shacabka iyo doorashooyinka la filayo mustaqbalka dhow.
Waxa uu sidoo kale tilmaamay in arrintaasi abuurayso niyad jab bulsho iyo cabsi laga qabo dib u dhac siyaasadeed.
Ra’iisul Wasaarihii hore Xasan Cali Khayre wuxuu ugu baaqay madaxda dowladda inay fursad siiyaan wada-hadal iyo iskaashi dhab ah oo u dhexeeya dhammaan dhinacyada siyaasadeed si loo helo hannaan dimoqraadi ah oo daahfuran.
Hadalkan Khayre ayaa kusoo beegmaya xilli khilaafyo siyaasadeed ay ka taagan yihiin jihada dalka u socdo, waxaana shacabka Soomaaliyeed u muuqda kuwo sugaya hoggaan mideeya, halkii uu kala qeybin lahaa.
