Wejiga saddexaad ee hawlgalka ciribtirka Daacish ee Puntland ayaa galay toddobaadkiisii labaad, kaddib markii Madaxweynaha Puntland Siciid Cabdullaahi Deni uu 27-kii February si rasmi ah ugu dhawaaqay in hawlgalku bilaabanayo.
Ciidanka Difaaca Puntland ayaa si qoto dheer ugu sii fidaya dhulka buuraleyda ah ee galbeedka Calmiskaad, halkaas oo ay kula dagaalamayaan Daacish, iyagoo isku dayaya in ay gebi ahaanba ka sifeeyaan gobolka Bari.
Sidoo kale, ciidamadu waxay hawlgal kale ka wadaan bartamaha Calmiskaad, halkaas oo dhawaan laga saaray kooxaha argagixisada. Wararka la helayo ayaa sheegaya in maleeshiyo tiro yar oo ka mid ah Daacish ay isku dayayaan inay dib ugu soo laabtaan deegaanka Tog-jaceyl, iyagoo doonaya inay carqaladeeyaan hawlgalka socda.
Ciidamada Puntland ayaa dhowaan daabulay cutubyo ka mid ah Daraawiishta oo ka howlgalaya bartamaha Calmiskaad, kuwaas oo raadinaya maleeshiyadaasi si ay u sugaan nabadda. Kabtan Raage Ciiro Qacle, oo ka mid ah saraakiisha hoggaamineysa hawlgalka, ayaa sheegay in xubnaha isku dayaya inay dhulka miino geliyaan lagu burburin doono goob kasta oo ay ku dhuuntaan.
Xalay ayay Puntland shaacisay in ciidamadu ay gacanta ku dhigeen nin looga shakisan yahay inuu ka tirsan yahay Daacish, kaas oo laga qabtay deegaanka Buruc ee hoostaga degmada Qandala. Baaritaan ayaa haatan ku socda shakhsigaasi.
Hawlgalka ciribtirka Daacish ayaa ahmiyad weyn u leh Puntland, iyada oo la doonayo in si buuxda looga suuliyo kooxaha argagixisada ee ku sugan deegaannada buuraleyda ah.
Taliyaha Ciidanka Daraawiishta Puntland, General Aadan Cabdi Xaashi, ayaa sheegay in hawlgalku uu si guul ah u socdo, isla markaana la fulinayo amarkii Madaxweyne Siciid Deni ee ahaa in la qabto ama la cirib tiro dagaalyahannada Daacish.
Afhayeenka Ciidanka Puntland, General Maxamuud Maxamed Axmed (Faadhigo), ayaa xusay in ciidamada difaaca Puntland ay ku taagan yihiin dariiqa lagu soo afjari lahaa kooxda Daacish, taas oo hoos u dhigtay awooddii militari ee kooxdaasi ku lahayd gobolka.
Ciidamada Puntland ayaa si joogto ah ugu sii fidaya deegaannada ay ku harsan yihiin kooxaha Daacish ee ka dagaallama buuraleyda Bari, iyagoo dadaal ugu jira in ay gebi ahaanba burburiyaan.