Wararka24: Qadka internet-ka ee Soomaaliya ayaa wajahaya cilad lama filaan ah, taas oo si weyn looga dareemay magaalada Muqdisho iyo gobollada kale ee dalka.
Warar la helay ayaa muujinaya in ciladda ay la xiriirto culeys ku yimid xargaha internet-ka ee mara badda hoosteeda, gaar ahaan aagga Badda Cas, taas oo sababtay hoos u dhac weyn oo ku yimid xawaaraha adeegga internet-ka.
Saameynta ciladdan kuma eka Soomaaliya oo kaliya, balse waxay sidoo kale saameysay dalal ay ka mid yihiin Kenya, Masar, iyo Pakistan, maadaama ay iyaguna adeegsanayaan isla xargaha internet-ka ee badda hoosteeda mara.
Shirkadda isgaarsiinta Hormuud ayaa xaqiijisay ciladdan, iyada oo macaamiisheeda la wadaagtay farriin ay ku caddeyneyso in kooxda farsamada ay si degdeg ah uga shaqeynayso sidii loo xallin lahaa arrintan. Shirkaddu waxay intaa ku dartay in ay la kaashaneyso khubaro caalami ah si dib loogu soo celiyo xawaaraha internetka.
Tan iyo waqtiyo hore, cilado noocan oo kale ah ayaa marar kala duwan saameyn ku yeeshay adeegyada internetka ee Soomaaliya, taas oo caqabad ku noqotay isticmaaleyaasha maadaama internet-ku yahay laf-dhabarka isku xirka bulshada iyo ganacsiga. Dadaallo xooggan ayaa haatan socda si loo hagaajiyo
Warbixin Cusub Hormuud ayaa sheegtay in la hagaajiyey culeyski internet-ka warbixinta hormuud ayaa u qorneyd Macaamiilkeena sharafta leh,
Waxaan kuugu bishaaraynaynaa in aan xallinnay culeyskii internet-ku uu ka dhashay cillad soo gaartay mid kamid ah xargaha internet-ka xambaara ee mara badda hoosteeda.
Macaamiil waxaan kaa raalli galineynaa culeys-ka ku yimid internetka, waxaana mar walba diyaar kuula nahay adeeg hufan oo joogta ah.
Mahadsanidiin.
