Wararka24: Isbitaalka Shaafi ee magaalada Muqdisho ayaa sheegay inuu markii ugu horreysay Soomaaliya ka fuliyay qalliin maqal-beeris ah, kaas oo loogu talagalay dadka qaba maqal-la’aanta daran. Qalliinnada ayaa la sameeyay 23-kii Oktoobar 2026, waxaana loo sameeyay laba bukaan oo kala ah wiil 9 jir ah iyo nin 22 jir ah.
wamaxay Qalliinkan oo loo yaqaan cochlear implant
Qalliinkan oo loo yaqaan cochlear implant ayaa adeegsada qalab elektaroonig ah oo lagu rakibo gudaha dhegta, kaas oo kiciya neerfaha maqalka si uu qofka uga caawiyo inuu maqlo dhawaaqyada. Waxaa loo adeegsadaa dadka qaba maqal-la’aan daran oo aan qalabka maqalka ee caadiga ahi si ku filan u caawin karin.
Dr. Ismaaciil Maxamed Cali, oo ku takhasusay cudurrada iyo qalliinnada dhegaha, sanka iyo cunaha, isla markaana fuliyay qalliinnada, ayaa sheegay in labada bukaan aysan waxba maqli jirin ka hor inta aan qalliinka lagu samayn. Wuxuu xusay in qalliinka laftiisa hal mar la sameeyo, balse bukaannadu ay u baahan yihiin dabagal caafimaad iyo tababar ku saabsan maqalka iyo hadalka.
Sida uu dhakhtarku sheegay, bukaannada ayaa lagu wadaa inay isbitaalka dib ugu soo laabtaan laba toddobaad gudahood si xaaladdooda loola socdo, loona bilaabo adeegyada baxnaaninta ee ay u baahan yihiin. Wuxuu sidoo kale waalidiinta kula taliyay inay carruurtooda qaba dhibaatooyinka maqalka xilli hore geeyaan xarumaha caafimaadka si loo qiimeeyo loogana helo daryeel ku habboon.
Mid ka mid ah dadka qalliinka lagu sameeyay waa Cabdixakiin Yuusuf Haliil oo 22 jir ah, kaas oo muddo sannado ah la noolaa maqal-la’aan. Aabbihiis, Yuusuf Haliil, ayaa sheegay in wiilkiisu dhibaatada maqalka la tacaalayay tan iyo sannadkii 2017, balse uu ku faraxsan yahay in la siiyay fursad uu dib ugu helo awoodda maqalka.
Aabbaha ayaa sidoo kale sheegay in wiilkiisu waxbarasho ku soo qaatay Kismaayo iyo xeryaha qaxootiga ee Kenya, kaddibna uu Muqdisho ka bartay cilmiga daawada Jaamacadda Ummadda Soomaaliyeed. Sida uu sheegay, qalliinka wiilkiisa waxaa lagu sameeyay lacag la’aan, inkastoo adeeggan uu guud ahaan yahay mid qaali ah.
Isbitaalka Shaafi ayaa sheegay in qalliinnada noocan ah ay markii hore bukaannada Soomaaliyeed ugu qasbanaayeen inay dibadda u aadaan, gaar ahaan dalalka Kenya, Hindiya iyo Pakistan. Kharashka qalliinka ayaa lagu qiyaasay 15,000 ilaa 20,000 oo doollar, sida uu isbitaalku sheegay, waxaana uu intaas ku daray in hore uu Kenya ugu diray ku dhowaad 15 bukaan oo u baahnaa adeeggan.
Adeeggan ayaa la hirgeliyay iyadoo lala kaashanayo shirkadda MED-EL ee dalka Austria, oo soo saarta qalabka maqal-beerista. Isbitaalku wuxuu sheegay in hirgelintiisu ay yareyn karto baahida bukaannada Soomaaliyeed u qabaan safarrada caafimaad ee dibadda, inkastoo bukaannadu weli u baahan yihiin dabagal iyo baxnaanin si loo qiimeeyo natiijada qalliinka.
