Wararka24: Hay’adda Dambi-baarista Federaalka Mareykanka ee FBI-da ayaa baadi-goobaysa Liban Abdulkadir Sheikh, oo lagu eedeeyay inuu ku lug lahaa dilka nin iyo dhaawaca haweeney ka badbaadday isku day dil oo ka dhacay magaalada Lakewood ee gobolka Washington sannadkii 2002.
Sida lagu sheegay xogta FBI-da, dhacdadu waxay dhacday 27-kii Nofeembar 2002, markii eedeysanaha lagu tuhmay inuu xoog ku galay guri ku yaalla dhismaha Meadowbrook Apartments ee Lakewood, halkaas oo uu rasaas ku furay laba qof.
FBI-da ayaa sheegtay in ninka la dilay dhowr xabbadood looga dhuftay madaxa, halka haweeneydii la socotay ay dhaawacyo rasaas ah ka soo gaareen dhabarka iyo lugta. Sida ay hay’addu sheegtay, eedeysanaha ayaa markii dambe ka baxay gobolka Washington, waxaana lagu arkay magaalada Minneapolis ee gobolka Minnesota.
Dacwad-oogayaasha gobolka Washington ayaa 27-kii Nofeembar 2002 soo saaray waaran lagu soo xirayo, kaddib markii lagu soo oogay eedeymo la xiriira dil darajada koowaad ah, weerar darajada koowaad ah iyo jabsi darajada koowaad ah. FBI-da ayaa sidoo kale sheegtay in 9-kii Diseembar 2002 la soo saaray waaran federaal ah oo la xiriira inuu ka baxsaday goobta si uu uga fogaado maxkamadeynta.
Hay’adda FBI-da ayaa ku dhawaaqday abaalmarin dhan 50,000 oo doollar oo la siinayo qofkii keena xog horseedda soo qabashada eedeysanaha. Hay’addu waxay dadka xogta haya ugu baaqday inay la xiriiraan FBI-da ama ay xogtooda ku gudbiyaan hababka rasmiga ah ee ay bixisay.
Sida ku cad xogta baadi-goobka, Liban Abdulkadir Sheikh waxaa laga yaabaa inuu xiriir la leeyahay ama uu booqday magaalooyin ay ka mid yihiin Seattle, Minneapolis iyo Columbus ee Mareykanka, iyo Surrey iyo Vancouver ee Canada. Waxaa sidoo kale la xusay Amsterdam, Oslo, London iyo Soomaaliya inay ka mid yihiin meelaha laga yaabo inuu tagay.
FBI-da ayaa ku tilmaantay eedeysanaha qof loo arko inuu hubeysan yahay oo khatar keeni kara, iyadoo bulshada uga digtay inay taxaddar muujiyaan haddii ay la kulmaan. Hay’addu waxay ku boorrisay dadka haya xog la xiriirta halka uu ku sugan yahay inay si toos ah ula xiriiraan saraakiisha ammaanka, halkii ay isku dayi lahaayeen inay iyagu qabtaan.
Kiiskan ayaa weli ku jira liiska dadka ay FBI-du baadi-goobayso, iyadoo hay’addu ku tiirsan tahay xogta bulshada si ay u hesho eedeysanaha loona horgeeyo cadaaladda.
