Wararka24: Hay’adaha federaalka Mareykanka ayaa xiray wiil 18 jir ah oo Soomaali-Mareykan ah, kaas oo lagu eedeeyay inuu qorsheynayay weerar dad badan lagu dilo oo lagu qaado xarunta ganacsiga Mall of America ee gobolka Minnesota, isagoo doonayay inuu weerarka ku fuliyo magaca Daacish.
Sheikhdoon Abdullahi Mohamud ayaa 6-dii October lagu xiray magaalada Richfield, kadib markii uu, sida ku xusan dacwadda federaalka, $600 ku bixiyay qori AK-47 ah, afar qasnad oo midkiiba qaado 30 xabbadood iyo ku dhowaad 200 oo xabbadood oo rasaas ah. Hubka iyo rasaasta waxaa u iibiyay sarkaal FBI ah oo si qarsoodi ah u shaqeynayay, iyadoo qoriga laga dhigay mid aan shaqeyn karin ka hor inta aan loo dhiibin.
safarka soomaaliya
Dacwadda ayaa sheegaysa in baaritaanka Mohamud uu billowday December 2024, xilligaas oo uu boqolaal farriimood la wadaagay xog-siiye sir ah oo FBI-da la shaqeynayay. Farriimaha ayaa lagu wadaagay baraha Telegram, Signal, Discord, TikTok iyo kuwo kale, waxaana lagu sheegay inuu markii hore ka hadlayay inuu Soomaaliya u safro si uu uga biiro Al-Shabaab.
Sida ay sheegeen dacwad-oogayaasha, markii qorshaha safarka dibadda uu adkaaday sababo dhaqaale awgood, Mohamud wuxuu bilaabay inuu ka fikiro weerar uu ka fuliyo gudaha Mareykanka. Dacwadda ayaa sheegaysa in hadalladiisa ay markii dambe si weyn ugu wareegeen Daacish, isagoo lagu eedeeyay inuu faafiyay dacaayadaha kooxda isla markaana muujiyay taageero uu u hayo.
Bishii July 2026, Mohamud ayaa lagu eedeeyay inuu bilaabay qorshe faahfaahsan oo ku saabsan weerar lagu qaado Mall of America. Dacwadda ayaa sheegaysa inuu doonayay inuu dilo inta u dhaxaysa 30 iyo 60 qof, isagoo bartilmaameedka u doortay dad badan oo halkaas isugu imaanayay, gaar ahaan munaasabad farshaxan oo bulshada Hmong ay qabaneysay 24-ka October.
Baarayaasha ayaa sheegay in Mohamud uu si joogto ah u xaqiijinayay inuu dhab ka yahay qorshihiisa, waxaana ugu dambeyn loo diyaariyay kulan uu la yeesho sarkaal FBI ah oo uu aaminsanaa inuu xiriir la leeyahay Daacish. 6-dii October ayuu kulankaas ku bixiyay $600, waxaana wax yar kadib lagu xiray goob ku taalla Richfield.
Xeer-ilaaliyaha Mareykanka ee Minnesota, Daniel Rosen, ayaa sheegay in baaritaanka uu awood u siiyay hay’adaha ammaanka inay ogaadaan khatarta ka hor inta aan la fulin qorshaha lagu eedeeyay. Madaxa FBI-da Minneapolis, Christopher Dotson, ayaa isna sheegay in baaritaanku muujiyay rabitaan loo qabo rabshado ku saleysan fikir xagjir ah.
Xabsiga ayuu ku sii jiri doonaa
Mohamud ayaa 7-dii October kasoo muuqday maxkamad federaal ah oo ku taalla St. Paul, halkaas oo lagu soo oogay hal dacwad oo la xiriirta helitaanka hub iyo rasaas iyadoo la og yahay ama loo haysto sabab lagu rumeysan karo in loo adeegsan doono fal dambiyeed federaal ah oo argagixiso. Maxkamaddu waxay amartay inuu sii xirnaado, iyadoo dhageysiga xiga ee arrinta xabsigiisa loo qorsheeyay 19-ka October.
Mas’uuliyiinta Mareykanka ayaa sheegay in baaritaanka ilaa hadda uusan muujin cid kale oo si toos ah ugu lug lahayd qorshaha. Wasaaradda Caddaaladda Mareykanka waxay caddeysay in dacwaddu ay tahay eedeyn oo keliya, isla markaana Mohamud loo aqoonsan yahay mid aan dambi lagu helin ilaa maxkamaddu si kama dambeys ah uga xukunto.
