Wararka24: 9-02-2026 Madaxweynihii hore ee Soomaaliya Maxamed Cabdullaahi Farmaajo ayaa si kulul u cambaareeyay tallaabadii uu maanta Madaxweyne Xasan Sheekh Maxamuud ku saxiixay dastuurka cusub ee dalka.
War-saxaafadeed uu soo saaray Farmaajo ayaa lagu sheegay in saxiixa dastuurkan uu yahay mid sharci-darro ah oo khatar gelinaya dowladnimada iyo wadajirka shacabka Soomaaliyeed.
Farmaajo ayaa ku dooday in dastuurka la saxiixay uusan haysan heshiis bulsho iyo mid siyaasadeed oo sharciyad siinaya, isagoo xusay in dowlad-goboleedyo, xildhibaanno iyo siyaasiyiin hore ay ka hor yimaadeen habraaca loo maray.
“Mowqifka dowlad goboleedyada ee ku saabsan laalista dastuurka, xildhibaannada qaaddacay fadhiyada iyo mas’uuliyiin hore oo diiday habraaca loo maray waxay muujinayaan inuusan jirin heshiis bulsho iyo mid siyaasadeed oo sharciyad siinaya tallaabadan,” ayuu yiri Farmaajo.
Madaxweynihii hore ayaa ugu baaqay Madaxweyne Xasan Sheekh Maxamuud inuu ka waantoobo saxiixa dastuurka, isla markaana uu dalka ku hoggaamiyo waddo wada-tashi iyo doorasho loo dhan yahay oo ku dhacda waqtigeeda.
Dhanka kale, Madaxweyne Xasan Sheekh Maxamuud ayaa maanta si rasmi ah u saxiixay nuqulka dastuurka cusub, isagoo sheegay in tallaabadan ay soo afjartay marxaladdii ku-meel-gaarka ahayd ee muddo dheer dalka uu ku shaqeynayay.
Dastuurkan cusub ayaa sidoo kale dhigaya in muddada xil-heynta Madaxweynaha iyo Baarlamaanka laga dhigo shan sano, arrintaas oo dhalisay muran siyaasadeed oo u dhexeeya dowladda iyo mucaaradka
