Wararka24: 9-02-2026 Madaxweynaha Jamhuuriyadda Federaalka Soomaaliya Xasan Sheekh Maxamuud ayaa maanta si rasmi ah u saxiixay nuqulka dastuurka cusub ee dalka, kadib markii ay ansixiyeen Labada Aqal ee Baarlamaanka Federaalka Soomaaliya.
Munaasabadda saxiixa oo ka dhacday Qasriga Madaxtooyada ee Muqdisho ayaa Madaxweynaha ku sheegay in dastuurkan uu yahay tiirka ugu muhiimsan ee dhismaha dowladnimada iyo nidaamka sharci ee Soomaaliya.
Madaxweyne Xasan Sheekh ayaa sheegay in maanta wixii ka dambeeya ay dowladdu bilaabi doonto dhaqan gelinta dastuurka cusub, kaas oo uu tilmaamay inuu saldhig u noqon doono xoojinta hay’adaha dowladda iyo horumarinta nidaamka dimuqraadiyadeed ee dalka.
“Maanta waxaa soo gabangaboobay safarkii dheeraa ee dib u eegista dastuurka Jamhuuriyadda Federaalka Soomaaliya, kaas oo muddo dheer ku meel gaar ahaa, isla markaana Baarlamaanka Federaalka uu dhowaan ansixiyay,” ayuu yiri Madaxweynaha.
Munaasabadda saxiixa dastuurka waxaa Madaxweynaha ku wehliyay Guddoomiyaha Golaha Shacabka Sheekh Aadan Maxamed Nuur (Aadan Madoobe), Guddoomiyaha Aqalka Sare Cabdi Xaashi Cabdullaahi iyo guddoomiyeyaasha guddiyada dib u eegista dastuurka.
