Raage Ceele, Shabeellaha Dhexe – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa Talaadadii ciidanka Macawiisley ee ku sugan Degmada Raage Ceele ugu baaqay inay si firfircoon uga qayb qaataan dagaalka lagula jiro Al-Shabaab, isagoo caddeeyay in uu isagu iyo maamulkiisa ay halkaa joogaan oo aan cidna ka maqan doonin.
“Ma Jiro Qof Dambe U Sugaya – Waa I Kanaa!”
Madaxweynuhu wuxuu si adag u sheegay in uu isagu, golaha wasiiradu, iyo saraakiisha ciidamadu ay goobta dagaalka joogaan, isagoo sheegay in qof danbe oo lasugaayo uusan jiran
“Ciidankii iyo Saraakiishii Dowladda waa joogaan, anigoo Madaxweynihii Jamhuuriyadda dadka ugu sarreyay waa i kanaa! Qof maqan ma jirto oo la sugayo… Waa i kanaa, wax iga dambeeyo oo dhan waa sugeysiin – Wasiiraa sugeysiin, jananaa sugeysiin – waa la idiin wada imaanaa!”
“Guul kasta oo Shabaab laga gaaro waa mid Soomaaliyeed!”
Madaxweyne Xasan Sheekh ayaa xusay in guusha lagula jiro Al-Shabaab ay tahay mid waddanimo leh, kana wada dhaxeeyso deegaannada Soomaaliyeed oo dhan:
“Guushiina ogaada, guushiinu guul Soomaaliyeed waaye – min Raas Kambooni illaa Looya-cadde! Meel kasta oo Khawaarij joogto, guusha laga keeno waa guul Soomaaliyeed. Haddii ay tahay Puntland oo buuraha lagula dagaalamayo Daacish, guusha ka timaado waan leenahay – annagaa iska leh!”
Baaq Mug leh oo Loo Diyaariyay Dagaalka
Madaxweynaha ayaa ciidanka Macawiisley ugu baaqay inay si xoojisan uga qayb qaataan howlgallada Shabeellaha Dhexe, iyadoo uu ballan qaaday in uu marar badan ku soo noqon doono goobta:
“Ballanaa wada galnay inaad dagaalka Shabaab gashaan. Geedkan in badanaa isugu soo noqnoqonaynaa, haddii Alle yiraahdo!”
Madaxweyne Xasan Sheekh oo Raage Ceele uga sii Gudbay Cadale
Madaxweyne Xasan Sheekh ayaa Raage Ceele uga sii gudbay Degmada Cadale, halkaas oo uu sii wadi doono abaabulka howlgallada ee lagula jiro Al-Shabaab. Dowladda Federaalka ayaa sii xoojinaysa dagaalka argagixisada, iyadoo ciidamada Xoogga Dalka, Macawiisley, iyo kooxaha AMISOM ay ku tababaran wiiqida Al-Shabaab ee gobolka Shabeellaha Dhexe.
📌 Wararka24 – Xog rasmi ah oo faahfaahin degdeg ah
