Ciidamada Xoogga Dalka Soomaaliyeed oo ay garab siinayaan maleeshiyaadka deegaanka ee Macawiisleyda ayaa fuliyey weerar qorsheysan oo lagu bartilmaameedsaday xubno ka tirsan Al-Shabaab oo ku sugnaa deegaanka Dhagaxley ee gobolka Shabeellaha Dhexe.
Wararka laga helayo halkaasi ayaa sheegaya in weerarka uu dhacay kadib markii la helay xog sirdoon oo muujinaysa in Al-Shabaab ay isku uruursanayeen si ay u abaabulaan weerarro ka dhan ah ciidamada dowladda iyo shacabka deegaanka.
Howlgalkan ayaa sababay dagaal culus oo labada dhinac dhex maray, waxaana ciidamada huwanta ay ku guuleysteen inay kala furfuraan xarumo istiraatiiji ah oo ay kooxdaasi ku lahayd deegaanka. Sidoo kale, waxaa la sheegay in la helay hub iyo saanad militari oo ay Al-Shabaab halkaas ku kaydisay.
Saraakiil ka tirsan cidamada ayaa tilmaamay in howlgalkani uu qeyb ka yahay qorshe ballaaran oo lagu xoreynayo deegaannada ay kooxdaasi kaga sugan tahay Shabeellaha Dhexe, iyada oo lagu adkeynayo amniga shacabka.
Xaaladda deegaanka Dhagaxley ayaa hadda ah mid deggan, waxaana ciidamada huwanta ay sii wadaan baaritaanno dheeraad ah si loo xaqiijiyo amniga guud.
Howlgallada noocan oo kale ah ayaa muujinaya sida ay uga go’an tahay dowladda iyo shacabka deegaanka in laga saaro Al-Shabaab meel kasta oo ay ku dhuumaaleysanayaan.