Warar hoose oo soo baxaya ayaa muujinaya in xiriirka u dhexeeya Dowladda Federaalka Soomaaliya iyo Dowladda Imaaraadka Carabta uu gaaray heer xasaasi ah, kaddib markii la sheegay in Imaaraadku uu wado qorshe siyaasadeed oo si toos ah uga dhan ah Madaxweyne Xasan Sheekh Maxamuud.
Sida laga soo xigtay ilo siyaasadeed oo xog ogaal ah, Dowladda Imaaraadka ayaa la rumeysan yahay inay maalgelin ku bixineyso olole ay horkacayaan kooxo mucaarad ah oo ka soo horjeeda hannaanka dowladda hadda jirta, iyadoo la doonayo in laga hor istaago waxqabadka Madaxweyne Xasan Sheekh iyo qorshihiisa dib-u-dhiska hay’adaha dowladda.
Ilo wareedyo kale ayaa tilmaamaya in dalal reer galbeed ah ay muujiyeen walaac xooggan oo la xiriira faragelinta sii kordheysa ee Imaaraadka ku hayo siyaasadda gudaha ee Soomaaliya. Dalalkaasi ayaa uga digay Imaaraadka inuu ku lug yeesho arrimo sababi kara xasilooni darro iyo kala qeybsanaan siyaasadeed oo hor leh.
Xogta ayaa sidoo kale muujinaysa in xiriirka labada dal uu hoos u dhacay tan iyo markii Dowladda Federaalka ay bilowday inay dib u eegis ku sameyso heshiisyo hore iyo xiriirkii hore ee ay la lahayd Imaaraadka. Tallaabooyinkan ayaa loo arkay kuwo uu Imaaraadku si gaar ah uga xanaaqay, taasoo sababtay in uu raadiyo siyaasad kale oo cadaadis ku ah Villa Somalia.
Diblomaasiyiin reer galbeed ah ayaa sheegay in Soomaaliya ay haatan u baahan tahay xasillooni siyaasadeed iyo taageero dibadeed oo dhab ah, halkii laga abuuri lahaa khilaaf hor leh oo ka dhasha danaha dowlado shisheeye.
Dowladda Soomaaliya weli si rasmi ah ugama hadlin wararkan, hase yeeshee saraakiil ka tirsan Villa Somalia ayaa si hoose u xaqiijiyay jiritaanka cadaadis siyaasadeed oo ka imaanaya dhinacyo dibadda ah, gaar ahaan kuwa doonaya inay saameyn ballaaran ku yeeshaan go’aamada dowladda dhexe.
Xaaladdan cusub ayaa imaanaysa iyadoo Soomaaliya ay wajahayo caqabado amni, dhaqaale iyo mid bulsho, taasoo u baahan wadajir qaran iyo taageero caalami ah si loo gaaro horumar waara.
