Maxkamadda ciidamada qalabka sida ee Puntland, gaar ahaan qeybta dambiyada culus ee Mudug iyo Cayn, ayaa la horgeeyay afar nin oo lagu eedeeyay inay ka tirsan yihiin kooxaha xagjirka ah ee Daacish iyo Al-Shabaab.
Saddex kamid ah eedeysanayaasha ayaa la sheegay inay magaalada Gaalkacyo kusoo geliyeen walxo qarxa oo ay kamid yihiin baaruud TNT ah iyo diyaarado aan duuliye lahayn (drones), kuwaas oo la tuhunsan yahay in loo adeegsan lahaa falal argagixiso.
Eedeysanaha afraad ayaa isna lagu eedeeyay inuu hore uga tirsanaa Al-Shabaab, balse uu damacsanaa inuu ku biiro kooxda Daacish, iyadoo ay ciidamada sirdoonka Puntland hayeen xogta dhaqdhaqaaqiisa taasoo keentay in gacanta lagu dhigo.
Magacyada eedeysanayaasha la horgeeyay maxkamadda waa:
1. Maxamud Daahir Maxamed – 25 sano jir, hooyadiis Maryan Cabdi
2. Cabdifitaax Xaashi Diiriye – 36 sano jir, hooyadiis Caasho Salaad
3. Jaylaani Shariif Siidow – 28 sano jir, hooyadiis Batuulo Macalin
4. Ciise Xuseen Ibraahim – 22 sano jir, hooyadiis Sahro Cali
Xeer ilaalinta ciidamada qalabka sida ayaa maxkamadda ka codsatay in dacwadda si degdeg ah loo qaado, si loo xaqiijiyo cadaalad isla markaana looga hortago khataraha argagixisada.
Dowladda Puntland ayaa sheegtay inay sii wadi doonto dagaalka ka dhanka ah kooxaha argagixisada, iyadoo la kaashaneysa bulshada deegaanka iyo taageerada saaxiibada caalamka.
Sidoo kale, maamulka ayaa adkeeyay in aysan jiri doonin wax tanaasul ah marka ay timaado sugidda amniga.
Puntland ayaa horey u fulisay howlgallo culus oo lagula dagaalamayay kooxaha xagjirka ah, waxaana la burburiyay saldhigyo badan oo ay ku lahaayeen buuraha Cal-Madow iyo Cal-Miskaad ee gobolka Bari.
