Wararka24: 14-01-2026: Madaxweynaha Dowlad-goboleedka Jubbaland, Axmed Maxamed Islaam (Axmed Madoobe), ayaa sheegay in maamulkiisu qaadi doono go’aanno adag haddii ilaa 20-ka bishan aan wax jawaab ah laga helin Madaxweynaha Jamhuuriyadda Federaalka Soomaaliya, Xasan Sheekh Maxamuud, oo ku saabsan nidaamka doorasho ee dalka.
Hadalkan ayuu ka jeediyay furitaanka kalfadhiga Baarlamaanka Jubbaland, isaga oo xusay in Jubbaland ay mar walba u taagan tahay ilaalinta midnimada iyo wadajirka Jamhuuriyadda Federaalka Soomaaliya, isla markaana aysan aqbali doonin go’aanno hal dhinac ah.
“Jubbaland waxa ay u taagan tahay midnimada iyo wadajirka Jamhuuriyadda Federaalka Soomaaliya. Somaliland waxa aan leeyahay, halka aad aadeen la idin kama jirto,” ayuu yiri Madaxweyne Axmed Madoobe.
Madaxweynaha Jubbaland ayaa carrabka ku adkeeyay in khilaafka siyaasadeed ee ka taagan hannaanka doorashooyinka uu u baahan yahay xal qaran oo lagu wada heshiiyay, isaga oo sheegay in aanay suurtagal ahayn in hal dhinac oo kaliya uu go’aan kama dambeys ah ka gaaro mustaqbalka doorashada.
Hadalladan ayaa ku soo beegmaya xilli ay xisbiyada mucaaradka hore u muujiyeen walaac la mid ah, iyaga oo ku hanjabay inay qaban doonaan doorasho iyaga u gaar ah haddii aan la helin hannaan doorasho oo lagu wada heshiiyay, kuna dhisan dastuurka iyo is-afgarad siyaasadeed.
Ugu dambeyn, Axmed Madoobe ayaa ugu baaqay dowladda federaalka inay si degdeg ah uga jawaabto walaacyada jira, isla markaana la isugu yimaado wadatashi ballaaran oo lagu badbaadinayo midnimada dalka iyo geeddi-socodka dimuqraadiyadeed ee Soomaaliya.
