Wararka24: Afhayeenka Wasaaradda Gaashaandhigga Turkiga, Admiral Zeki Aktürk, ayaa sheegay in afar markab oo ka tirsan ciidamada badda ee dalkaas ay u soo ambabixi doonaan Soomaaliya 16-ka Maarso.
Maraakiibta oo kala ah TCG Göksu, TCG Bayraktar, TCG Bartın iyo TCG Yzb. Güngör Durmuş ayaa ka dhaqaaqi doona Bariga Badda Mediterranean-ka, waxaana la sheegay in hawlgalkooda uu qayb ka yahay qorshaha ciidamada badda ee “Türkiye Somalia Naval Task Group”.
Wasaaradda Gaashaandhigga Turkiga ayaa sheegtay in hawlgalkan uu yahay mid lagu xoojinayo iskaashiga dhinaca badda ee u dhexeeya Soomaaliya iyo Turkiga, gaar ahaan ilaalinta amniga badda iyo taageerada howlaha wadajirka ah ee labada dal.
Wararka ayaa sidoo kale tilmaamaya in maraakiibtan ay marka hore ku soo xiran doonaan dekedda Muqdisho, ka dibna ay u sii gudbi doonaan dhanka Badda Cas si ay uga qeyb qaataan ilaalinta biyaha Soomaaliya.
Horay waxaa biyaha Soomaaliya ugu sugnaa maraakiib kale oo Turkiga leeyahay oo ay ku jiraan kuwa ilaalinaya hawlaha la xiriira sahaminta shidaalka ee ka socda xeebaha dalka, taas oo muujinaysa kororka joogitaanka ciidamada badda ee Turkiga ee gobolka.
