Wararka24: 27-02-2026 Dowladda Federaalka Soomaaliya ayaa sheegtay in taageerada milateri ee Turkiga ay wax ka beddeshay jihada hawlgallada ka dhanka ah Al-Shabaab, iyadoo Ciidanka Xoogga Dalka ay gaareen guulo la taaban karo oo ku saabsan la wareegidda deegaanno iyo wiiqidda awoodda kooxda.
Wasiirka Warfaafinta, Daa’uud Aweys Jaamac, oo wareysi siiyay wargeyska Cumhuriyet ee Turkiga, ayaa sheegay in iskaashiga joogtada ah ee Ankara uu kordhiyay awoodda iyo tayada ciidamada dowladda.
Sida uu wasiirku sheegay, taageeradaasi waxay qayb ka tahay heshiis difaac iyo dhaqaale oo labada dal kala saxiixdeen horraantii 2024. Ilo dhanka amniga ah ayaa sheegay in qalab milateri iyo tababaro dheeraad ah la bixiyay bilihii u dambeeyay, si loo xoojiyo cutubyada sida gaarka ah loo tababaro, oo ay ku jiraan ciidamada Gorgor ee lagu carbiyo xerada TURKSOM ee Muqdisho.
Wasaaradda Gaashaandhigga Turkiga ayaa sidoo kale beenisay warar la xiriiray in nidaamka difaaca cirka ee S-400 loo wareejinayo Soomaaliya, iyadoo ku tilmaantay wararkaas kuwo aan sax ahayn. Dowladda Turkiga ayaa sheegtay in taageeradeedu ku saleysan tahay la-dagaalanka argagixisada iyo dhisidda awoodda ciidamada Soomaaliya.
Iskaashiga labada dal ayaa sidoo kale leh dhinac dhaqaale. Wasiirka Warfaafinta ayaa xusay in markab mool-qodis shidaal oo uu Turkigu leeyahay uu ku wajahan yahay xeebaha Soomaaliya, si loo bilaabo hawlgallo tijaabo ah oo sahamin ah. Dowladda ayaa sheegtay in tallaabooyinkaasi ay qayb ka yihiin qorshe ballaaran oo lagu xoojinayo amniga iyo horumarka dhaqaale ee dalka.
Mas’uuliyiinta ayaa tilmaamay in dadaalladan ay kusoo beegmayaan xilli ay Soomaaliya sii kordhinayso wada-shaqeynta caalamiga ah, isla markaana ay xoojinayso awooddeeda amni si loo xaqiijiyo xasillooni waarta.
