Wararka24: Dowladda Sacuudi Carabiya ayaa sheegtay inay xaq u leedahay inay qaaddo tallaabo militari oo ka dhan ah Iiraan, kadib weerarro gantaallo ah oo lagu beegsaday magaalada Riyadh, sida uu sheegay wasiirka arrimaha dibadda dalkaasi.
Wasiirka arrimaha dibadda Sacuudiga Amiir Faisal bin Farhan ayaa sheegay in kalsoonidii u dhexeysay Riyadh iyo Tehran ay gebi ahaanba burburtay, isaga oo Iiraan ku eedeeyay inay si ula kac ah u waddo falal colaadeed oo ka dhan ah dalalka deriska ah.
Hadalka wasiirka ayaa yimid kadib kulan ay Riyadh ku yeesheen diblomaasiyiin ka socday dalal badan oo gobolka ah, kuwaas oo ka wada hadlayay xaaladda amni ee sii xumaaneysa iyo xiisadda taagan.
Dhanka kale, Iiraan ayaa ku eedeysay Israa’iil inay weerartay xarumo ku yaalla goobta gaaska laga soo saaro ee South Pars, taasoo sare u qaaday xiisadda dagaalka ka socda gobolka.
Wararka ayaa sheegaya in qiimaha shidaalka uu sare u kacay, iyadoo Iiraan ay ballanqaadday inay beegsan doonto kaabayaasha tamarta ee dalalka Khaliijka, islamarkaana ay gantaallo ku garaacday meelo ka mid ah Sacuudi Carabiya iyo Qatar.
Intii uu socday kulanka Riyadh, waxaa la arkayay nidaamyada difaaca hawada oo ka hortagaya gantaallo, xilli ay halkaasi ku sugnaayeen wasiirro arrimo dibadeed oo ka kala socday dalal dhowr ah oo gobolka ah.
Xiisadda u dhexeysa Iiraan iyo xulafada Mareykanka iyo Israa’iil ayaa gashay toddobaadkeedii saddexaad, iyadoo aan weli muuqan wax hoos u dhac ah, taasoo saameyn ku yeelatay amniga gobolka iyo sahayda tamarta caalamka.
DAAWA
