Wararka24: Madaxweynaha Jamhuuriyadda Federaalka Soomaaliya Xassan Sheekh Maxamud ayaa si rasmi ah ugu baaqay kulan siyaasadeed oo ay ka qeyb-galayaan xubnaha Golaha Mustaqbalka Soomaaliyeed, si looga wada hadlo xaaladda siyaasadeed ee cakiran ee dalka. Kulanka ayaa la qorsheeyay inuu qabsoomo 10-ka May, sida lagu sheegay war-saxaafadeed kasoo baxay madaxtooyada.
Qoraalka madaxtooyada ayaa sheegay in casuumaaddan ay ka dhalatay wada-tashiyo uu madaxweynuhu la yeeshay siyaasiyiin, madax hore, odayaal dhaqameed iyo qeybaha kala duwan ee bulshada. Dowladda ayaa sheegtay in ujeeddadu tahay in la helo is-afgarad siyaasadeed oo looga gudbo marxaladda adag ee dalka.
Ajandaha kulanka ayaa diiradda lagu saari doonaa arrimaha doorashooyinka, dowlad-dhiska, midnimada qaranka iyo jihada siyaasadeed ee mustaqbalka Soomaaliya. Madaxtooyada ayaa tilmaantay in loo baahan yahay wadahadal daah-furan iyo niyad-wanaag si loo gaaro natiijo wax ku ool ah.
Madaxweyne Xasan Sheekh ayaa adkeeyay muhiimadda isu-tanaasulka iyo is-qancinta, isagoo sheegay in xilligan loo baahan yahay in dhinacyada siyaasadda ay muujiyaan mas’uuliyad iyo wadajir si dalka looga ilaaliyo khilaaf siyaasadeed oo sii xoogeysta.
Casuumaaddan ayaa kusoo aadaysa xilli mucaaradka ay sare u qaadeen cadaadiska siyaasadeed, iyagoo horay u sheegay in marka la gaaro 15-ka May ay qaadi doonaan go’aanno ku saabsan xaaladda siyaasadeed ee dalka.
Golaha Mustaqbalka Soomaaliyeed ayaa kamid ah dalladaha siyaasadeed ee saameynta ku leh doodaha doorashooyinka iyo dastuurka, waxaana la sugayaa in ay ka jawaabaan baaqa madaxweynaha.
Kulanka 10-ka May ayaa loo arkaa mid muhiim u noqon kara jihada siyaasadeed ee Soomaaliya, xilli dalka uu wajahayo muran xooggan oo ku saabsan doorashooyinka iyo hannaanka dowladnimada.
