Wararka24: Dowladda Federaalka Soomaaliya ayaa si weyn u adkeysay amniga caasimadda Muqdisho iyo agagaarkeeda, iyadoo diiradda la saarayo kontoroollada laga soo galo magaalada. Tallaabadan ayaa timid ka hor 15-ka May oo ay jirto xiisad siyaasadeed oo sii kordheysa.
Ilo amni ayaa sheegay in Taliska Booliska uu ciidamo dheeraad ah geeyay kontoroollada bannaanka Muqdisho, si loo xoojiyo amniga iyo kormeerka gaadiidka soo galaya. Sidoo kale waxaa la xoojiyay joogitaanka ciidamada meelaha istaraatiijiga ah.
Wararka ayaa sidoo kale tilmaamaya in ciidamo lagu kordhiyay degmooyinka Balcad iyo Afgooye, si looga hortago dhaqdhaqaaqyo ciidan oo iman kara Muqdisho. Tani waxay qayb ka tahay qorshe amni oo ballaaran oo dowladda Federaalka ay waddo.
Taliyaha Booliska Soomaaliyeed Jeneraal Asad Cismaan Cabdullaahi ayaa faray saraakiisha in ay adkeeyaan amniga kontoroollada, isla markaana si buuxda loo dhaqan geliyo habraacyada kormeerka gaadiidka. Waxa uu sidoo kale ku adkeeyay xog-wadaagga hay’adaha amniga.
Dhinaca kale, xaaladda siyaasadeed ee Muqdisho ayaa kacsan, iyadoo mucaaradka ay wadaan kulamo ku saabsan 15-ka May oo ay ku tilmaameen dhammaadka muddo-xileedka dowladda. Dowladda ayaa ka digtay in wax rabshado ah ay ka dhacaan magaalada.
Xiisadda hadda jirta ayaa lagu xusuustaa dhacdooyinkii April 2021, markii Muqdisho ay ka dhaceen dagaallo siyaasadeed oo sababay in laga laabto muddo-kororsi. Shacabka Muqdisho iyo odayaasha qaar ayaa hadda ku baaqaya xasillooni iyo wada hadal.
