Wararka24: Kulan albaabada u xiran yahay ayaa maanta ka socda hoyga madaxweynihii hore ee dalka Sheekh Shariif Sheekh Axmed, kaas oo u dhexeeya safiirka dowladda Turkiga ee Soomaaliya iyo xubnaha mucaaradka. Kulankan ayaa imanaya xilli ay sii xoogeysanayaan dhaq-dhaqaaqyada siyaasadeed ee ka socda caasimadda Muqdisho.
Wararka la helayo ayaa sheegaya in kulanka uu diiradda saarayo xaaladda cakiran ee dalka, gaar ahaan khilaafka ka taagan hannaanka doorashooyinka iyo isfaham la’aanta dhinacyada siyaasadda. Mucaaradka ayaa la sheegay inay si gaar ah ula hadleen safiirka Turkiga Alper Aktaş, iyagoo ka codsaday in Ankara ay ka fogaato ku milanka khilaafaadka gudaha, isla markaana ay sii xoojiso doorkeeda dhexdhexaadnimo.
Sidoo kale, ilo xog-ogaal ah ayaa tilmaamaya in dood adag ay dhex martay labada dhinac, maadaama Turkigu uu door muuqda ku leeyahay arrimaha Soomaaliya, gaar ahaan dhinacyada amniga, horumarinta iyo diblomaasiyadda. Arrintan ayaa ka dhigaysa kulanka mid xasaasi ah oo indhaha lagu hayo.
Kulankan ayaa kusoo aadaya xilli mucaaradku ay wadaan kulamo isdaba joog ah oo ay la yeelanayaan qeybaha kala duwan ee bulshada, sida odayaasha dhaqanka, culimada iyo haweenka, si ay uga tashadaan marxaladda kala guurka ah ee dalka. Waxaa sidoo kale la filayaa inay la kulmaan ururrada bulshada rayidka ah si ay uga dhageystaan talooyin ku saabsan jihada siyaasadeed.
Dhaqdhaqaaqyadan siyaasadeed ayaa imanaya iyadoo Soomaaliya ay weli wajahayo hubanti la’aan la xiriirta doorashooyinka iyo wax ka beddelka dastuurka, taas oo sii xoojisay khilaafka u dhexeeya dowladda iyo mucaaradka. Labada dhinac ayaa weli isku mari la’ arrimaha ugu muhiimsan ee geeddi-socodka siyaasadeed.
Ugu dambeyn, kulanka u socda safiirka Turkiga iyo mucaaradka ayaa la filayaa inuu door ka ciyaaro fahamka mowqifyada kala duwan, inkastoo aan weli la ogeyn natiijada ka soo bixi doonta wada-hadalladan xasaasiga
