Wararka24: Dowladda Shiinaha ayaa sheegtay inay sii kordhinayso taageerada ay siiso Somalia, kadib kulan ka dhacay xarunta Wasaaradda Amniga Gudaha ee Muqdisho. Kulanka ayaa u dhexeeyay Wasiirka Amniga Gudaha Cabdullaahi Sheekh Ismaaciil Fartaag iyo danjiraha Shiinaha Wang Yu.
Kulanka ayaa diiradda lagu saaray xoojinta iskaashiga amni ee labada dal, gaar ahaan dhinacyada dhismaha iyo tayeynta ciidamada amniga. Waxaa sidoo kale laga wada hadlay la dagaallanka xagjirnimada iyo horumarinta hay’adaha ammaanka.
Wasiirka Amniga Gudaha ayaa uga mahadceliyay Shiinaha taageerada joogtada ah ee uu siiyo Soomaaliya. Wuxuu xusay in iskaashigan uu door muhiim ah ka qaato sugidda xasilloonida iyo amniga dalka.
Danjire Wang Yu ayaa dhankiisa xaqiijiyay in Shiinaha uu sii wadi doono taageerada dhinaca amniga. Wuxuu si gaar ah u xusay horumarinta hay’adaha miino-baarista iyo tababarka shaqaalaha si loo yareeyo khataraha miinooyinka.
Kulanka waxaa sidoo kale ka qeyb galay Agaasimaha Guud ee Wasaaradda Amniga Gudaha Maxamed Shire iyo la-taliye sare Shoki Hayir. Mas’uuliyiintan ayaa ka qayb qaatay wadahadallada ku saabsan qorshayaasha amniga.
Labada dhinac ayaa isla qaatay in la sii xoojiyo wada shaqeynta istiraatiijiga ah, iyadoo la doonayo in la horumariyo awoodda hay’adaha amniga Soomaaliya. Waxaa la filayaa in iskaashigan uu yeesho saameyn togan oo ku saabsan xasilloonida dalka.
Kulankan ayaa muujinaya xiriirka sii xoogeysanaya ee u dhexeeya Soomaaliya iyo Shiinaha, gaar ahaan dhinacyada amniga iyo horumarinta hay’adaha dowladda.
