Wararka24: Xisbiga Xasan Sheekh Maxamud ee Cadaaladda iyo Wadajirka (JSP) ayaa si rasmi ah u shaaciyay musharraxa uu u taageerayo doorashada madaxtinimada maamulka Koonfur Galbeed Soomaaliya, iyadoo loo xushay Sheekh Aadan Madoobe.
Go’aanka xisbiga ayaa yimid kadib wada-tashi gudaha ah, iyadoo Sheekh Aadan Madoobe laga hormariyay musharraxiin kale oo ka tirsanaa isla xisbiga, kuwaas oo la sheegay inay tartanka uga hareen heshiisyo siyaasadeed iyo ballanqaadyo xilal ah.
Wasiirka Arrimaha Gudaha Soomaaliya Cali Yusuf Ali Xosh ayaa munaasabad lagu shaacinayay musharraxnimada ka sheegay in shacabka Koonfur Galbeed ay taageeraan Sheekh Aadan Madoobe, isaga oo ku tilmaamay shaqsi ku habboon hoggaanka maamulka.
Villa Soomaaliya ayaa muddooyinkii dambe si weyn ugu lug lahayd diyaarinta doorashada Koonfur Galbeed, iyadoo dadaal xooggan lagu bixiyay sidii hoggaanka maamulkaasi loogu dooran lahaa shaqsi ay dowladda federaalka si dhow ula shaqeyn karto.
Sheekh Aadan Madoobe ayaa hadda loo arkaa musharraxa ugu cadcad tartanka, maadaama uu haysto taageerada dowladda dhexe iyo qeyb ka mid ah siyaasiyiinta saameynta ku leh deegaanada maamulka Koonfur Galbeed.
Dhanka kale, siyaasiyiin iyo xubno mucaarad ah ayaa walaac ka muujiyay habka loo wajahayo doorashadan, iyagoo sheegay in tartanka uu u muuqdo mid aan si buuxda u furneyn, xilli magaalada Baidoa ay ku jirto marxalad siyaasadeed oo xasaasi ah.
