Wararka24: Dowladda Federaalka Soomaaliya ayaa si adag u cambaareysay weerarro lagu bartilmaameedsaday kaabayaasha tamarta ee Sacuudi Carabiya, Qatar iyo Imaaraatka Carabta, kuwaas oo la sheegay in ay fuliyeen diyaarado aan duuliye lahayn oo laga leeyahay Iiraan.
War-saxaafadeed kasoo baxay Wasaaradda Arrimaha Dibadda Soomaaliya ayaa lagu sheegay in weerarradaasi ay yihiin xadgudub culus oo ka dhan ah sharciga caalamiga ah, isla markaana ay halis gelinayaan amniga iyo xasilloonida gobolka.
Soomaaliya ayaa sheegtay in ay si buuxda u garab taagan tahay dowladaha iyo shacabka dalalka la beegsaday, iyadoo muujisay taageero ku aaddan ilaalinta madaxbannaanidooda iyo badbaadada muwaadiniintooda.
Qoraalka ayaa sidoo kale lagu xusay baaq ku aaddan in la dejiyo xiisadda, isla markaana la xoojiyo wadahadal si loo ilaaliyo marinada tamarta ee muhiimka u ah dhaqaalaha caalamka.
Dowladda Soomaaliya ayaa sheegtay in ay sii wadayso la shaqeynta dalalka gobolka iyo beesha caalamka si loo xoojiyo nabadda loona ilaaliyo kaabayaasha muhiimka ah.
Weerarradan ayaa imaanaya iyadoo xiisad sii kordheysa ay ka dhex taagan tahay Iiraan iyo qaar kamid ah dalalka Khaliijka, kuwaas oo horey isugu khilaafsanaa arrimo amni iyo siyaasadeed.
