Boosaaso – Ciidamada Puntland ayaa gacanta ku dhigay muwaadin u dhashay Turkiga oo lagu magacaabo Feyzul Xaashim Suleymaan, kadib howlgalkii toddobaadkan lagu fuliyay deegaanka Togga Baalade ee gobolka Bari.
Qabashadan ayaa qeyb ka ah wajiga afraad ee hawlgalka “Hilaac”, oo looga gol leeyahay in lagu beegsado dagaalyahannada Daacish ee buuraleyda Cal-Miskaad.
Ciidamada amniga ayaa sidoo kale sheegaya in weli la raadinayo labo qof oo magacyadoodu yihiin Emre Kemal Yılmaz iyo Aylin Derya Kaya, oo lagu tuhunsan yahay inay ka mid yihiin shabakadaha argagixisada.
Taliyaha ciidanka Darawiishta Puntland, Gen. Axmed Cabdilaahi Sheekh, ayaa sheegay in qaar ka mid ah Turkiga la qabtay ay hore uga tirsanaayeen ciidamada milatariga Turkiga, islamarkaana ay ka qeyb qaateen isku daygii afgambigii fashilmay bishii Juun 2016
Saraakiishu waxa ay sheegeen in warbixinnada hordhaca ah ay muujinayaan in xubnahan ay markii hore ku biireen Daacish Suuriya, ka dibna loo wareejiyay buuraleyda Cal-Miskaad, si halkaas uga wadaan hawlahooda argagixisada.
Arrintan ayaa kusoo beegmaysa xilli Puntland ay xoogeystay hawlgallada lagula dagaallamayo argagixisada gudaha gobolka Bari gaar ahaan buuraleyda Cal-Miskaad.
