Muqdisho – Madaxweynihii hore ee Soomaaliya Maxamed Cabdullaahi Farmaajo ayaa maanta soo saaray bayaan uu ku taageerayo shirka wadatashiga qaranka ee uu ku dhawaaqay Madaxweyne Xasan Sheekh Maxamuud, isagoo ugu baaqay Puntland iyo Jubbaland in ay ka qeybgalaan shirka.
War-saxaafadeedka ayaa ku soo beegmay xilli la diyaarinayo shirka 15-ka June ee Muqdisho ka dhacaya. Shirka ayaa looga hadlaya habka doorashada, arrimaha amniga iyo qodobada dastuurka.
“Waxaan soo dhaweynayaa muddaynta gogosha uu fidiyey Madaxweyne Xasan Sheekh Maxamuud ee ku saabsan in wadatashi Qaran laga yeesho arrimaha masiiriga ah ee dalka,
kuwaas oo ay ugu horreeyaan doorashada, amniga iyo Dastuurka,” ayuu qoray Farmaajo.
Labada maamul ee waqooyi-bari iyo koonfurta ayaa ka maqnaa kulamadii hore ee dawladda dhexe iyo dowlad goboleedyada.
Hoggaamiyayaashoodu waxay ka walaacsan yihiin habka dawladda federaalka ula dhaqanto madax-bannaanida gobolka.
Farmaajo ayaa ku adkeeyay in ka qeybgalka dhammaystiran ee goboladu uu muhiim u yahay natiijooyin wax ku ool ah.
Si gogoshan ay miro dhal u noqoto, waxaan adkaynayaa baaqyaga ku aaddan in si dhammaystiran ay uga soo qeyb-galaan Madaxda Dowlad-goboleedyada, gaar ahaan Puntland iyo Jubbaland,” ayuu ku daray.
Madaxweynihii hore ayaa talooyin gaar ah u soo jeediyay maamulka hadda jira. Bayaankiisa ayaa Madaxweyne Xasan Sheekh ku baaqay “in uu ka laabto tallaabooyinka halka dhinac ee khilaafku ka taagan yahay.”
Waxa uu tilmaamay dhowr arrimood oo dib u eegis u baahan. Kuwaas waxaa ka mid ah wax ka bedelka dastuurka lagu sameeyay xilliga doorashada hadda so socota,
shaqada xeerarka iyo guddiyada doorashada oo aan la dhammeystirin, iyo burburinta Golaha Wadatashiga Qaranka.
“Arrinkaas oo caqabad ku noqonaya dowlad-dhiska iyo wadashaqeynta heer Federaal iyo heer Dowlad-goboleed,” ayuu farmajo yidhi
Shirka wadatashiga ee la filayo bishii June dhexdeeda ayaa imanaya xilli xiisado ka dhexeeya Muqdisho iyo gobolada qaarkood. Puntland iyo Jubbaland midkoodna ma xaqiijin ka qeybgalka shirka soo socda.
