Hargeysa – Alle ha u naxariistee, Fanaanka Safwaan Hilaac ayaa ku geeriyooday shil gaari oo xalay fiidkii ka dhacay magaalada Hargeysa, caasimadda Somaliland.
Wararka ayaa sheegaya in gaariga uu watay fanaanka iyo dad kale oo la socday uu shil galay, halkaasna uu Safwaan Hilaac ku geeriyooday, iyadoo dhaawacyo culus ay soo gaareen qaar ka mid ah dadka kale ee saarnaa gaariga. Booliska Somaliland, gaar ahaan qeybta taraafikada, ayaa gaaray goobta shilku ka dhacay waxayna bilaabeen baaritaan ku saabsan sababta keentay.
Geerida Safwaan Hilaac ayaa saakay gilgishay baraha bulshada, iyadoo fannaaniinta, saaxiibbadiis iyo taageerayaal fara badan ay tacsi iyo murugo ku cabbireen qoraallo ay ku daabaceen bogaggooda. Dad badan ayaa Eebbe uga baryay inuu u naxariisto kana dhaafo dambigiisa.
Safwaan Hilaac wuxuu ka mid ahaa fanaaniinta dhalinyarada Soomaaliyeed ee ku caan baxay Yurub, isagoo heeso iyo hal-abuur faneed ay aad u jecleysteen jiilka cusub. Geeridiisu waxay ka tagtay bannaan weyn oo ka dhex muuqda fanka Soomaaliyeed.
