Agaasimaha Hay’adda Nabad-sugidda iyo Sirdoonka Qaranka (NISA), Mahad Maxamed Salaad, ayaa xalay booqasho ku tegay madaxweynayaasha Jubbaland iyo Puntland oo ku sugan xerada Xalane, halkaas oo uu ugu bandhigay damaanad amni si ay ugu tagaan Villa Soomaaliya wada-hadallada ay la leeyihiin Madaxweyne Xasan Sheekh Maxamuud.
Mahad Salaad ayaa hoggaamiyeyaasha labada maamul kula shiray hoteelka ay ka degan yihiin gudaha xeyndaabka garoonka Aadan Cadde, isagoo ku booriyay in wadahadallada rasmiga ah lagu qabto xarunta Madaxtooyada si xal looga gaaro khilaafka siyaasadeed ee taagan.
Sidoo kale, Agaasimaha NISA ayaa kulan gaar ah la yeeshay Madaxweynihii hore Maxamed Cabdullaahi Maxamed (Farmaajo), iyadoo laga wada hadlay is-mari-waaga siyaasadeed iyo sida xal loogu heli karo muranka ka dhashay hannaanka doorashooyinka iyo wax ka beddelka Dastuurka Kumeelgaarka ah.
Dood xooggan ayaa weli ka taagan halka lagu qabanayo wada-hadallada u dhexeeya Villa Soomaaliya iyo Golaha Mustaqbalka, waxaana Jubbaland iyo Puntland ay ku adkeysanayaan in shirka lagu qabto gudaha xerada Xalane, halka Villa Soomaaliya ay ku adkeysanayso in Madaxtooyada lagu qabto.
Dhanka kale, Wasiirka Warfaafinta Jubbaland ayaa si kulul uga jawaabay hadal kasoo yeeray Wasiiru-dowlaha Gaashaandhigga, kaas oo sheegay in Axmed Madoobe iyo Saciid Deni ay ku qasban yihiin inay tagaan Villa Soomaaliya, isagoo tilmaamay in madaxda Jubbaland iyo Puntland aysan ku qasbanayn in Madaxtooyada tagaan, balse ay u joogaan “badbaadinta dowladnimada dalka.”
Kulamada u dhexeeya madaxda mucaaradka, madaxweynayaasha maamullada iyo saraakiisha ammaanka ayaa weli socda, iyadoo la filayo in saacadaha soo socda ay caddeeyaan halka ugu dambeyn lagu qaban doono wada-hadallada rasmiga ah.
Xiisaddan siyaasadeed ayaa imanaysa xilli dalka uu wajahayo is-mari-waa xooggan oo la xiriira arrimaha doorashooyinka iyo wax ka beddelka dastuurka.
