Wararka24: Ciidanka Daraawiishta Jubbaland ee ka howlgala degmada Afmadow ayaa fuliyay howlgal qorshaysan oo lagu beegsaday deegaanno ku yaalla woqooyiga magaalada, halkaas oo lagu soo qabtay xubin ka tirsan Al-Shabaab.
Howlgalkan ayaa yimid kadib xog ay heleen ciidamada oo ku saabsan dhaqdhaqaaqyo ay wadeen xubno ka tirsan Al-Shabaab oo ku sugnaa deegaannada miyiga ah ee hoos yimaada Afmadow.
Ciidamada ayaa aroornimadii hore ee Jimcaha baacsaday xubnahaasi, iyagoo ka fuliyay howlgallo baaritaan ah goobihii ay ku dhuumaaleysanayeen.
Saraakiisha hoggaaminaysay howlgalka ayaa sheegay in la sameeyay baaritaanno ballaaran si loo xaqiijiyo amniga deegaannada la beegsaday loogana hortago khataro amni.
Intii uu socday howlgalka, ciidamada ayaa gacanta ku dhigay Cali Macalin Cali Nuur oo loo yaqaanay Musamil, kaas oo la sheegay inuu muddo afar sano ah ka tirsanaa Al-Shabaab.
Mas’uuliyiinta amniga Jubbaland ayaa sheegay in howlgalkaasi uu qeyb ka yahay dadaallada lagu xoojinayo amniga Afmadow iyo deegaannada ku xeeran.
DAAWA
