Muqdisho – Dowladda Federaalka Soomaaliya ayaa shaacisay in ay maanta furto 52 waddo oo kala duwan oo ku yaalla caasimadda Muqdisho, taas oo qeyb ka ah qorshe lagu hagaajinayo isu socodka iyo kaabayaasha magaalada.
Xafiiska Ra’iisul Wasaaraha ayaa war-saxaafadeed ku sheegay in tallaabadan la qaaday iyada oo lala kaashanayo maamulada gobollada iyo maamulka Gobolka Banaadir, si loo dardar geliyo dib u habaynta Wadooyinka iyo inay shacabka helaan marin furan oo ammaan ah.
War-saxaafadka ayaa sidoo kale faahfaahinaya in waddooyinkan cusub ay yihiin kuwo hore u jiray oo la dayactiray ama burbur nadiifayn lagu sameeyay, lana filayo in la adeegsado si joogto ah.
Tallaabadan ayaa imaaneysa xilli Muqdisho ay wajahaysay dhibaatooyin isku socod oo aan habboonayn, gaadiidka oo ciriiri iyo waddooyin xiran oo saameeyay dhaqdhaqaaqa maalinlaha ah ee bulshada. Dowladda ayaa sheegtay in howshan ay tahay mid bilow ah, isla markaana ay qorsheyneyso in waddooyin kale oo badan la furto.
