Sida uu baahiyay wargeyska The Times, diblomaasi Soomaaliyeed oo hore uga howlgalayay Sacuudi Carabiya ayaa lagu eedeeyay inuu gacan ka geystay tahriibinta haween farabadan lagu geliyay Ireland, taas oo walaac hor leh ka dhalisay kororka shabakadaha caalamiga ah ee dadka tahriibiya.
Diblomaasigan Ayaa lagu magacaaba Cabdiladiif Xuseen Maxamed, oo 40 jir ah, ayaa horey u ahaa la-taliyaha waxbarashada ee safaaradda Soomaaliya ee Riyadh. Warbixinnadu waxay sheegayaan inuu fududeeyay in haween badan si dhuumaaleysi ah loogu geliyo Ireland intii u dhaxaysay September ilaa November 2024.
Diblomaasigan Soomaaliyeed Cabdiladiif ayaa la xiray bishii November markuu ka soo degay garoonka diyaaradaha Dublin, isagoo ka yimid Abu Dhabi, waxaana haatan lagu hayaa xabsiga Cloverhill ee Ireland.
Wasaaradda Arrimaha Dibadda Soomaaliya ayaa xaqiijisay inuu mar ka tirsanaa safaaradda, inkastoo ilo-wareedyo sheegayaan in xilka laga qaaday sanadkii 2023, balse cadaadis ka yimid beesha uu ka soo jeedo dartii dib loogu soo celiyay shaqadiisa.
Kiiskan ayaa sare u qaaday baaqyada loogu yeerayo xoojinta isla xisaabtanka diblomaasiyiinta iyo dadaallada lagula dagaallamayo tahriibinta dadka, iyada oo la doonayo in iskaashi caalami ah lagu xakameeyo dambiyada noocan oo kale ah.
Maxay kaga dhigantahay dowlada soomalia in Diblomaasi katirsan Wasaaradda Arrimaha Dibadda Soomaaliya uu kuxiranyahay dalka ireland, Wasiirka Arrimaha Dibadda, Axmed Fiqi Ayaan wali wax faahfaahin ah kabixin arintaan…