Muqdisho – Musharrax madaxweyne Xasan Cali Khayre ayaa caawa kulan muhiim ah kula yeeshay hoygiisa magaalada Muqdisho qaar ka mid ah aqoonyahanka, dhalinyarada iyo haweenka Soomaaliyeed, kuwaas oo isaga la wadaagay aragtidooda ku saabsan xaaladda guud ee dalka iyo arrimaha doorashooyinka.
Kulanka ayaa ku salaysnaa isweydaarsi talooyin iyo dood furan oo ku saabsan siyaasadda dalka, iyadoo musharrax Khayre uu sawir guud ka bixiyay xaaladda siyaasadeed ee taagan iyo dadaallada socda ee looga samatabixinayo dalka cawaaqib xumo ka dhalan karta doorasho aan heshiis lagu dhisin ama xaalad doorasho la’aan ah.
Ka qeyb galayaasha ayaa dhankooda muujiyay walaac ay ka qabaan jihada uu dalku u socdo, waxayna ku dhiirrigeliyeen Xasan Cali Khayre iyo guud ahaan siyaasiyiinta mucaaradka ah in ay sii wadaan dadaallada lagu xaqiijinayo in dalka uu ku laabto dhaqankii siyaasadeed ee wanaagsan, kaas oo afartii sanaba lagu qabto doorasho heshiis lagu wada yahay.
