Washington (wararka24)– Madaxweynaha Mareykanka, Donald Trump, ayaa si weyn u soo dhaweeyay jawaabta ay Xamaas ka bixisay hindisihiisa xabad joojinta Gaza ee lagu soo afjari doono dagaalka, isla markaana Ciidamada Israel si buuxda uga bixi doonaan Marinka Gaza.
Ururka Xamaas ayaa xalay sheegay inay ogolaatay qaybo ka mid ah qorshaha Trump, oo ay ku jiraan sii deynta maxaabiista nool, wareejinta meydadka kuwa dhintay iyo in Ciidamada Israel ay ka baxaan deegaannada Gaza marka la buuxiyo shuruudaha ku xusan hindisaha.
Madaxweyne Trump ayaa muuqaal uu soo duubay oo lasoo dhigay bartiisa Truth Social ku sheegay inuu aaminsan yahay in jawaabta Xamaas ay muujinayso in ay diyaar u yahiinnabad waarta. “Aniga oo ka duulaya bayaanka ay Xamaas hadda soo saartay, waxaan aaminsanahay inay diyaar u tahay nabad waarta. Maanta waa maalin aad u weyn,” ayuu yiri.
Trump ayaa sidoo kale tilmaamay muhiimadda ay leedahay in la soo celiyo Maxaabista,
isagoo sheegay: “Waxaan rajaynayaa in la haysteyaasha ay guryahooda ku soo laabtaan.”
Madaxweynaha Mareykanka ayaa Israel ugu baaqay inay si degdeg ah u joojiso duqaynta Gaza si loo fududeeyo sii deynta maxaabiista. “Israel waa inay si degdeg ah u joojiso duqaynta Gaza, si aan u soo saarno la haysteyaasha si nabad ah oo degdeg ah. Tani waxay ku saabsan tahay nabadda muddada dheer la raadinayay ee Bariga Dhexe,” ayuu yiri.
Trump ayaa xusay in wadahadallada socda ay ku dhow yihiin inay horseedaan nabad waarta oo gobolka ah, isagoo dalalka gobolka sida Qatar, Masar, Turkiga, Sacuudiga iyo Jordan uga mahadceliyay kaalintooda ku aaddan xaqiijinta qorshaha nabadda.
Ra’iisul Wasaaraha Israel, Benjamin Netanyahu, ayaa horey u aqbalay hindisaha Trump, kaas oo lagu sheegay inuu yahay jidka loo marayo soo afjaridda dagaalka Gaza ee socday ku dhowaad laba sano.
