Wararka24: 2-02-2026 Senator-ka Mareykanka Lindsey Graham ayaa dhammaadkii bishii Febraayo safar ku tagay Sacuudi Carabiya, halkaas oo uu kulan kula yeeshay Dhaxal-sugaha Boqortooyada, Maxamed bin Salmaan, si uu ugala hadlo mowqifka Riyadh ee ku aaddan weerar milatari oo ka dhan ah Iiraan, sida ay baahisay warbaahinta Middle East Eye oo soo xiganeysa ilo xog-ogaal ah.
Ilo Maraykan iyo Carbeed oo la hadlay warbaahintaas ayaa sheegay in hoggaanka Sacuudigu aanu si toos ah uga hor imaan fikradda tallaabo milatari, inkasta oo markii hore uu doorbidayay xal diblomaasiyadeed oo ku saabsan barnaamijka nukliyeerka Iiraan.
Wararka ayaa muujinaya in wada-hadallo u dhexeeyay Washington iyo Riyadh ay ahaayeen kuwo qoto dheer, isla markaana ay jireen wadatashiyo ku saabsan kaalinta ay boqortooyadu qaadan karto haddii xiisaddu sii kororto.
Wakaaladda Wararka Sacuudiga ayaa Sabtidii cambaareysay weerarro ay Iiraan ku qaaday dalalka Khaliijka, iyadoo ku tilmaantay kuwo wax u dhimaya amniga iyo xasilloonida gobolka. Madaxweyne Donald Trump ayaa sidoo kale la sheegay inuu khadka telefoonka kula hadlay Dhaxal-sugaha, inkasta oo aan si rasmi ah loo shaacin faahfaahinta wada-hadalkaas.
Weerarrada is-daba jooga ah ee u dhexeeya Mareykanka, Israa’iil iyo Iiraan ayaa sababay qalalaase ku fiday dalal badan oo Khaliijka ah. Dalalka gobolka ayaa adeegsaday nidaamyada difaaca cirka si ay uga hortagaan gantaallo iyo diyaarado aan duuliye lahayn, iyadoo khasaare isugu jira dhimasho iyo dhaawac la soo wariyay.
Sacuudi Carabiya iyo dalalka kale ee Khaliijka ayaa wajahaya go’aan adag oo ku saabsan sida ay uga falcelinayaan xaaladda sii kacsan.
Ilaa hadda, ma jiro war rasmi ah oo muujinaya in Riyadh si cad ugu biirtay hawlgal kasta oo milatari, balse warbixinadu waxay tilmaamayaan in wada-xaajoodyo heer sare ah ay weli socdaan.
