Wararka24: 2-02-2026 Dowladda Imaaraadka Carabta ayaa si rasmi ah ugu dhawaaqday inay xirtay safaaraddeedii ku taallay caasimadda Iiraan ee Tehran, isla markaana ay kala soo baxday safiirkeedii iyo dhammaan shaqaalihii diblomaasiyadeed ee halkaas ka howlgali jiray.
Bayaan kasoo baxay Wasaaradda Arrimaha Dibadda ee Imaaraadka ayaa lagu sheegay in go’aankan uu ka dhashay weerarro gantaallo ah oo lagu bartilmaameedsaday goobo rayid ah, oo ay ku jiraan xaafado la deggan yahay, garoomo diyaaradeed iyo dekedo.
Dowladda ayaa weerarradaas ku tilmaantay kuwo halis geliyay nolosha shacabka isla markaana xadgudub ku ah madaxbannaanideeda.
Xukuumadda Abu Dhabi ayaa sheegtay in xiritaanka safaaradda uu yahay tallaabo ka tarjumaysa mowqif adag oo ay kaga jawaabeyso waxa ay ku sheegtay gardarro toos ah. Waxay sidoo kale ka digtay in xiisadda sii kordheysa ay khatar ku tahay xasilloonida gobolka iyo dhaqaalaha caalamka.
Go’aankan ayaa kusoo beegmaya xilli weerarro la sheegay inay Iiraan fulisay ay saameyn ku yeesheen kaabayaasha rayidka ee dalkaas, iyadoo hawada Imaaraadka si ku-meel-gaar ah loo xiray.
Dhanka kale, Tehran ayaa sheegtay in bartilmaameedkeedu yahay oo keliya saldhigyada milatari ee Mareykanka ee gobolka.
Ilaa iyo hadda, Iiraan kama aysan soo saarin jawaab rasmi ah oo ku saabsan xiritaanka safaaradda Imaaraadka, iyadoo xaaladda gobolka ay weli tahay mid kacsan.
