Belem – Wararka24: Ra’iisul Wasaare ku xigeenka koowaad ee Xukuumadda Federaalka Soomaaliya, Saalax Axmed Jaamac, ayaa magaalada Belem ee dalka Brazil kaga qayb galay Shirka Caalamiga ah ee Isbeddelka Cimilada (COP30), isagoo ku baaqay in la qaado tallaabooyin degdeg ah oo lagu yareynayo saameynta sii kordheysa ee cimilada isbedelaysa.
Saalax Axmed Jaamac, oo khudbad ka jeediyay madasha, ayaa sheegay in Soomaaliya ay kamid tahay dalalka ugu nugul saameynta cimilada, gaar ahaan abaaraha soo noqnoqda iyo wasakhowga hawada oo sababay xaalado adag oo nololeed.
“Cimilada isbeddelaysa waxay si toos ah u saameysay nolosha shacabka Soomaaliyeed, iyadoo abaaro, fatahaado iyo nabaad-guur soo noqnoqda ay dhaawaceen dhaqaalaha iyo nolosha bulshada,” ayuu yiri Saalax Axmed.
Ra’iisul Wasaare ku xigeenka ayaa sidoo kale carrabaabay qorshaha Soomaaliya ee NDC iyo Qorshaha La-qabsiga Cimilada, kuwaas oo qayb ka ah Qorshaha Isbeddelka Qaranka (NTP 2025–2029). Wuxuu xusay in qorshahani diiradda saarayo afar qodob oo waaweyn:
- La-qabsiga isbeddelka cimilada.
- Maalgelinta cimilada iyo mashaariicda deegaanka.
- Khasaaraha iyo magdhowga.
- Kobcinta tamarta nadiifta ah.
Wuxuu beesha caalamka ugu baaqay inay si dhab ah u taageeraan Soomaaliya iyo dalalka kale ee nugul, si loo yareeyo khasaaraha iyo halista ka dhalata isbeddelka cimilada, loona xaqiijiyo mustaqbal deegaan oo waara.
“Wadamada dakhligoodu hooseeyo, sida Soomaaliya, waxay u baahan yihiin maalgelin, aqoon iyo iskaashi caalami ah si ay u maareeyaan khataraha sii kordhaya ee cimilada,” ayuu raaciyay Saalax Axmed Jaamac.
Shirka COP30 ee ka socda magaalada Belem ayaa lagu wadaa in lagu gaaro heshiisyo cusub oo caalami ah oo la xiriira dhimista qiiqa wasakhda hawada iyo maalgelinta mashaariicda deegaanka ee dalalka soo koraya.
