Nairobi – Puntland iyo Somaliland ayaa maanta ku gaaray magaalada Nairobi heshiis taariikhi ah oo ku saabsan iskaashi dhanka amniga, ganacsiga iyo nabadeynta bulshada, ka dib shir socday 4–5 October 2025 oo ay ka qeyb galeen wasiiro iyo saraakiil sare oo ka kala socday labada dhinac.
War-murtiyeed laga soo saaray shirka ayaa lagu sheegay in labada dhinac ay si wadajir ah uga wada hadleen xaaladda amni, siyaasadeed iyo dhaqaale ee Geeska Afrika, gaar ahaan masaalixda gaarka ah ee labada dhinac ay iska leeyihiin. Waxaa la isku afgartay iskaashi dhow oo ku saabsan dagaalka ka dhanka ah argagixisada Al-Shabaab iyo Daacish, la dagaalanka dambiyada badda iyo ka hortagga dambiyada abaabulan ee saameeya danaha amniga iyo dhaqaalaha.
Qodobada heshiiska Puntland iyo Somaliland ka soo baxay ayaa waxaa ka mid ahaa:
1. Iskaashiga amniga – Puntland iyo Somaliland waxay ku heshiiyeen inay si wadajir ah uga hortagaan argagixisada, dambiyada badda iyo falalka sharci-darrada ah ee halista ku ah gobolka.
2. Nabadeynta bulshada – Waxaa la isla gartay muhiimadda nabad kama dambeys ah oo lagu soo afjaro colaaddii Ceerigaabo, iyadoo dadka barakacay lagu booriyay inay si nabad leh ugu soo laabtaan guryahooda. Puntland iyo Somaliland waxay ballanqaadeen taageero buuxda oo lagu xoojinayo gogosha nabadda.
3. Ganacsiga iyo isu socodka bulshada – Labada dhinac ayaa qiray baahida loo qabo in la xoojiyo isu socodka bulshada iyo ganacsiga, lana hirgeliyo kaabayaal dhaqaale oo isku xira.
4. Maamulka hawada – Shirku wuxuu si cad u cambaareeyay siyaasadda ku xad-gudubka badqabka duulimaadyada rayidka ah iyo isticmaalka hawada.
Gunnaanadkii shirka ayaa lagu adkeeyay muhiimadda joogteynta wada shaqeynta, taageerada dadaallada nabadda iyo iskaashiga la dagaalanka argagixisada. Puntland iyo Somaliland ayaa sidoo kale caddeeyay inay diyaar u yihiin wada shaqeyn miro dhal ah oo ay la yeeshaan Beesha Caalamka, si loo xoojiyo nabadda iyo horumarka gobolka.
Heshiiskan ayaa la arkayaa inuu yahay mid taariikhi ah, maadaama uu yahay markii ugu horreysay ee Puntland iyo Somaliland si rasmi ah ugu heshiiyaan iskaashi amni iyo ganacsi, iyadoo dhowaan Puntland ay sidoo kale heshiis siyaasadeed la gashay Jubbaland iyo Madasha Mucaaridka.
