Hay’adda Sirdoonka iyo Nabadsugidda Qaranka ee NISA ayaa shaacisay inay burburisay buundo macmal ah oo kooxda Al-Shabaab ay dhowaan ka dhistay deegaanka Oobaale ee gobolka Shabeellaha Dhexe. Buundadan ayaa kooxda u ahayd marin muhiim ah oo ay u adeegsan jireen dhaqdhaqaaqyadooda militari, gaar ahaan gudbinta dagaalyahannada iyo gaadiidka ay ku weerari jireen deegaannada gobolka.
Buundadan, oo laga dhisay kunteenarro iyo biro shub ah, waxay ku taallay meel u dhow deegaanka Oobaale oo uu maro Webiga Shabeelle, halkaas oo hoos tagta Degmada Mahadaay.
Sida xogaha la helay ay muujinayaan, buundadan waxaa dhismaheeda la dhammeystiray bishii hore ee February, waxyar ka hor inta aysan Al-Shabaab isku dayin inay ku fidaan deegaano horey uga xoroobay gacantooda.
Yaa garab kusiiyey NISA qorshahaan burburinta buundadaas?
War rasmi ah oo ka soo baxay NISA Sida ay cadeeysay Casimada ayaa lagu sheegay in howlgal qorsheysan oo ay ciidamadooda, oo kaashanaya saaxiibada caalamka, ka fuliyeen Oobaale lagu burburiyay buundadaasi, taasoo ay kooxdu u adeegsan jirtay in ay isku xiraan aagagga ay kaga sugan yihiin gobolka.
Dowladda Soomaaliya, gaar ahaan Hay’adda Nabad Sugidda & Sirdoonka Qaranka (NISA), ayaa sheegtay in Al-Shabaab ay buundadan u dhisteen si ay uga faa’iidaystaan dhaqdhaqaaqyadooda militari, balse burburinteeda ay cadaadis dheeraad ah ku kordhin doonto kooxda. Sida lagu sheegay war ka soo baxay NISA, duqeynta waxaa lagu dilay horjoogayaal iyo maleeshiyaad ka tirsan Al-Shabaab, sidoo kalena waxaa lagu burburiyay gaadiid dagaal oo ay isticmaalayeen.
Milatariga Soomaaliya ayaa dhowaan ogaaday halista buundadas, kadib markii ay heleen xog muhiim ah oo ay la wadaageen dadka deegaanka. Burburinteeda ayaa qeyb ka ah howlgallo ballaaran oo lagu xakameynayo dhaqdhaqaaqa Al-Shabaab, iyadoo dagaalka looga hortagayo uu xoogeystay maalmahan.
Muddo dheer, Al-Shabaab ayaa burburinayay buundooyinka ay adeegsadaan ciidamada dowladda iyo kuwa maamul goboleedyada, si ay u carqaladeeyaan dhaq-dhaqaaqa ciidamada iyo sahayda dagaalka. Si kastaba ha ahaatee, tani waa markii ugu horreysay oo la burburiyo buundo ay iyagu dhiseen, taasoo caqabad hor leh ku noqon doonta isku socodkooda iyo qorshahooda dagaal ee gobolka.
Taliska Ciidanka Xoogga Dalka ayaa sheegay in la xoojinayo duqeymaha iyo howlgallada lagu beegsanayo meelaha ay Al-Shabaab ka helaan taageerada iyo marinnada istiraatiijiga ah ee ay u adeegsadaan dagaalka.
Howlgalladan ayaa qeyb ka ah dadaallada sii socda ee dowladda federaalka iyo saaxiibada caalamiga ah ay ku wiiqayaan awoodda Al-Shabaab, si looga hortago in kooxdaasi dib uga soo kabato deegaannada laga xoreeyay.
Dhanka kale, hoggaamiye ku-xigeenkii Al-Shabaab ee gobolka Shabeellaha Dhexe, Yuusuf Dhegnaas, ayaa lagu dilay duqayn kale oo ka dhacday aagga degmada Ruun-Nirgood xalay fiidkii.