Madasha Samatabixinta Soomaaliyeed oo uu ku jiraan madaxdii hore iyo xisbiyada mucaaradka ayaa galabta ka hadlay xulista xubnaha Guddiga Madaxbannaan ee Xuquuqul Insaanka.
Ururka ayaa ku eedeeyay dowladda federaalka inay ku xadgudubtay sharciga markay bilaabatay xulista guddiga. Waxay sheegeen in la jabiyay qodobada 41 iyo 111B ee dastuurka iyo xeerka lambarka 16 ee sanadka 2016.
Bayaan ay soo saareen ayaa lagu yiri xulista hadda socota waa mid aan habboonayn. Waxay sheegeen in Villa Somalia ay faragelin ku hayso habka xulista.
Madasha ayaa codsaday in deg deg loo joojiyo magacaabista ilaa la hubiyo in sharci lagu socdo. Waxay dalbadeen in xukuumadda ay ka fogaato arrintan.
Ururka ayaa sheegay in dadka Soomaaliyeed ee aqoonta leh ay xaq u leeyihiin inay codsan kuraasta guddiga. Waxay ku baaqeen in tartanka loo furo dadweynaha oo warbaahinta hortiisa lagu qabto.
Madasha ayaa la hadlay hay’adaha caalamiga ah iyo ururada xuquuqda aadanaha. Waxay ka codsadeen inay la socdaan habka xulista si aan guddiga loogu isticmaalin ujeedo gaar ah.
Bayaanka ayaa ku soo gabagaboobay baaq loogu jeedinayo dhamaan dhinacyada ay khusayso in la ilaaliyo sharciga iyo dastuurka marka la xulayo guddiga.
