Madaxweyne Trump ayaa ka hadlay wakhtiga uu dhamaanayo dagaalka Ukraine iyo Ruushka kadib markii la waydiiyey su’aalo ku saabsan sababaha asalka ah ee kadanbeeya dagaalka bilowgiisa iyo sida uu ku dhamaanayo.
Marki Wax laga waydiiyey Trump in Putin uu sheegay in dagaalka uusan dhammaan doonin ilaa si dhab ah wax looga qabto sababta marka hore keentay colaadda udhaxeysa labada dal.
Trump ayaa ku jawaabay “Hagaag, dagaalku wuu dhammaan doonaa. Goorta uu dhammaanayo ma sheegi karo, laakiin dagaalku wuu dhammaan doonaa.”
Madaxweyne Trump ayaa intaa ku daray isago yidhi “Zelensky wuxuu rabaa inuu dhammaado, Vladimir Putin-na wuxuu rabaa inuu dhammaado.”
Trump ayaa sheegay in dunida oo dhan ay ka daashay dagaalka Ukraine. Wuxuu ballan qaaday inuu soo afjari doono colaadda.
Madaxweynaha ayaa tilmaamay inuu horey u soo afjaray lix dagaal kala duwan. Wuxuu sheegay inuu moodayay in dagaalka Ukraine uu noqon doono kan ugu fudud ee uu la kulmo.
Hase yeeshee Trump ayaa caddeeyey in dagaalkan uu yahay mid ka adag intii uu filayay. Wuxuu ku tilmaamay “dagaal adag, aad buuna u culus yahay.”
Hadalkani wuxuu ku yimid xilli ay jiraan dadaallo lagu doonayo in la gaaro heshiis nabadeed oo joojiya dagaalka Ukraine oo socda muddo in ka badan saddex sano.
