Madaxweynaha Iran, Masoud Pezeshkian, ayaa si cad u sheegay in dalkiisu aanu ka tanaasuli doonin barnaamijkiisa nukliyeerka, isagoo xusay in cadaadis iyo hanjabaad kasta aysan waxba ka beddeli doonin go’aanka Tehran.
Pezeshkian ayaa hadalkan ka jeediyay madal rasmi ah oo lagu qabtay magaalada Tehran, wuxuuna ku adkeystay in barnaamijka nukliyeerka ee Iran uu yahay mid si buuxda loogu adeegayo danaha nabadeed, sida koronto-dhalinta iyo cilmi-baarista, balse aanay jirin wax gorgortan ah oo laga gali karo.
Hadalka madaxweynaha Iran ayaa yimid iyadoo beesha caalamka, gaar ahaan Mareykanka, ay sare u qaaday cadaadiska ka dhanka ah Iran, waxaana dhawaan laga maqlay hanjabaado cusub oo ka yimid madaxda Mareykanka oo ku saabsan tallaabooyin lagu xakameynayo barnaamijkaasi.
Pezeshkian ayaa si adag u sheegay in Iran aysan ogolaan doonin in la farageliyo xuquuqda ay u leedahay barnaamijka nukliyeerka ee ujeedkiisu yahay nabad iyo horumar. Wuxuu intaas ku daray in dalkiisa uu diyaar u yahay wadahadallo dhab ah, balse aysan aqbali doonin wax shuruudo ah oo cadaadis ah.
Dowladda Iran ayaa muddo dheer ku doodeysay in hawlaheeda nukliyeerka aysan wax xiriir ah la lahayn horumarinta hubka, halka waddamada reer galbeedka ay ka cabsi qabaan in Iran ay barnaamijkan u adeegsan karto dhinacyo ciidan.
Heshiiskii nukliyeerka ee la gaaray sanadkii 2015 ayaa burburay kadib markii Mareykanka uu ka baxay, taas oo keentay in Iran ay dib u bilowdo hawlo horumarineed oo la xiriira barnaamijkeeda. Inkasta oo khilaafku uu sii qoto dheeraaday,
hadalka Madaxweynaha Iran Pezeshkian wuxuu muujinayaa in weli ay iran diyaar u tahay in ay miiska wadahadalka timaaddo, balse aysan dooneyn in lagu qasbo wax aan waafaqsanayn madax-bannaanideeda siyaasadeed iyo horumarkeeda.
