Wararka24: Xubnaha mucaaradka Koonfur Galbeed ayaa degmada Buurhakaba kusoo bandhigay ciidamo aad u hubeysan, xilli ay socdaan dhaqdhaqaaqyo ciidan oo ka dhan ah maamulka uu hoggaamiyo Cabdicasiis Lafta-gareen.
Ciidamadan ayaa lagu arkay safaf dhaadheer, waxaana la hadlay mas’uuliyiin ku sugan halkaasi oo ku booriyay inay u diyaar garoobaan howlgal, maadaama ay isku horfadhiyaan ciidamada Daraawiishta Koonfur Galbeed.
Wararka ayaa sheegaya in ciidamadan lagu xoojiyay askar kale oo laga soo qaaday degmada Xudur, kuwaas oo ku biiray ciidamo horey uga jiray deegaannada ku dhow Baydhaba.
Mas’uuliyiin ka tirsan dowladda Federaalka oo la hadlay ciidamada ayaa sheegay in loo baahan yahay in la xaqiijiyo doorasho ka dhacda deegaanada, iyagoo uga digay maamulka Koonfur Galbeed xaaladda taagan.
Dhanka kale, dowladda Federaalka ayaa horey ciidamo gaar ah ugu dirtay magaalada Baraawe, taasoo sii kordhisay xiisadda u dhexeysa labada dhinac.
Tallaabadan cusub ayaa kusoo aadeysa xilli madaxweyne Lafta-gareen uu magacaabay guddiga doorashada, iyadoo weli uu muran ka taagan yahay hannaanka loo marayo doorashada.
Xiisadda siyaasadeed iyo dhaq dhaqaaqyada ciidan ee ka socda Koonfur Galbeed ayaa sii xoogeysanaya, iyadoo laga cabsi qabo isku dhacyo hor leh.
DAAWA
