Wararka24: Maxkamadda Ciidamada Qalabka Sida ayaa xukuno kala duwan ku ridday eedeysaneyaal lagu helay falal la xiriira basaasid iyo taageeridda kooxo hubeysan, kadib markii lagu eedeeyay inay bartilmaameedsadeen feeryahanadda Soomaaliyeed Ramla Cali.
Eedeysanaha ugu weyn Cabdisalaam Maxamed Xasan oo loo yaqaan Aamusane ayaa lagu xukumay 10 sano oo xabsi ah, kadib markii lagu helay inuu ka tirsanaa shabakad uruurisa xogaha amniga iyo abaabulka falal halis ah tan iyo sanadkii 2014.
Maxkamaddu waxay sheegtay in eedeysanaha uu sahmiyay goobo muhiim ah, islamarkaana gudbiyay xog ku saabsan xarumo dowladeed iyo bartilmaameedyo ay ka mid ahayd Ramla Cali oo booqasho ku timid Muqdisho.
Sidoo kale Cabdinaasir Cumar Axmed Subeyr ayaa lagu xukumay laba sano oo xabsi ah, halka Faadumo Cismaan Subeyr Cali iyo Leylo Seef Faarax Axmed lagu kala xukumay min hal sano oo xabsi ah kadib markii lagu helay inay gabaad siiyeen eedeysaneyaasha.
Dhanka kale, Cabdullahi Cusmaan Maxamed ayaa la sii daayay kadib markii maxkamaddu sheegtay in aan loo helin caddeymo ku filan oo muujinaya inuu dib ugu laabtay falal la xiriira argagixisada, iyadoo la tixgeliyay doodda qareenkiisa.
Xeer ilaalinta ciidamada ayaa sheegay in kiiskan uu yimid kadib baaritaanno dheer, isla markaana maxkamaddu ay waqti ku filan siisay dhammaan dhinacyada ka hor inta aan la gaarin go’aanka kama dambaysta ah.
