Jamaal Cali Xuseen, oo ka mid ah siyaasiyiinta madax-bannaan ee Somaliland, ayaa shacabka ugu baaqay in ay si ballaaran ugu soo baxaan fagaarayaasha magaalooyinka waaweyn, si ay taageero buuxda ugu muujiyaan dadaallada xukuumaddu ku doonayso aqoonsiga caalamiga ah.
Jamaal ayaa sheegay in taageerada shacabka ay muhiim u tahay, maadaama ay fariin cad u gudbinayso beesha caalamka in qorshaha aqoonsi raadintu yahay mid ay bulshada oo dhan wadaagto, ma aha oo keliya xukuumadda.
“Waxaan shacabka Somaliland ugu baaqayaa in ay si nabad ah fagaarayaasha ugu soo baxaan, si aynu dunida u tusno in rabitaanka aqoonsigu yahay mid shacabka oo dhan ka go’an, ma aha oo keliya xukuumadda,” ayuu yidhi Jamaal Cali Xuseen.
Baaqa siyaasigan ayaa yimid xilli xukuumadda Somaliland ay dardar gelisay kulamo iyo dadaallo diblomaasiyadeed oo lagu raadinayo aqoonsi rasmi ah, hase yeeshee hadalka Jamaal waa mid ku kooban aragtidiisa shakhsiyeed maadaama aanu xil dawladeed hadda haynin.
